BMTning Nyu-Yorkdagi qarorgohida 30-mart kuni “Barqaror rivojlanish maqsadlariga erishishda maqbul yechim sifatida chiqindining nol darajasi roli” mavzusida Bosh assambleyaning yuqori darajadagi majlisi bo‘lib o‘tdi.
Turkiya hukumati, BMTning Atrof-muhit bo‘yicha va aholi punktlari dasturlari (BMT-Xabitat) ko‘magida tashkil etilgan tadbirda O‘zbekiston Oliy Majlisi Senatining Orolbo‘yi mintaqasini rivojlantirish masalalari va ekologiya qo‘mitasi raisi Boriy Alixonov ishtirok etdi.
Majlisda Boriy Alixonov o‘z ma’ruzasida Shavkat Mirziyoyev rahbarligida O‘zbekistonda atrof-muhitni muhofaza qilish, chiqindilarni boshqarish va qayta ishlash tizimini tubdan takomillashtirish, shuningdek, aholining ekologik madaniyatini yuksaltirish bo‘yicha amalga oshirilayotgan keng ko‘lamli chora-tadbirlar haqida atroflicha axborot berdi.
Atrof-muhitni muhofaza qilish konsepsiyasi va 2030-yilgacha “yashil iqtisodiyot”ga o‘tish strategiyasi qabul qilingani, ularda aholiga qattiq maishiy chiqindilarni yig‘ish va olib chiqish bo‘yicha xizmatlar ko‘rsatishni 100 foizga yetkazish, hosil bo‘ladigan maishiy chiqindilarni qayta ishlash darajasini 65 foizga oshirish, shuningdek, “aylanma iqtisodiyot” tamoyillarini keng joriy etish bo‘yicha belgilangan vazifalar izchil amalga oshirilayotgani alohida ta’kidlandi.
Ta’kidlanishicha, mazkur chora-tadbirlar maishiy chiqindilarni poligonlarga tashlash hajmini 60 foizgacha kamaytirish, 200 dan ortiq chiqindi poligonlari yerlarini to‘liq o‘zlashtirish, yashil hududga aylantirish, yangi ish o‘rinlari yaratish imkonini beradi. Majlisda ishtirokchilar O‘zbekiston 2022-yilda Metan chiqindilarini kamaytirish bo‘yicha global majburiyatlarga qo‘shilgani va 2030-yilga borib ularning hajmini 30 foizga kamaytirishni maqsad qilgani ma’lum qilindi.
2023-yilning boshida O‘zbekistonda Markaziy Osiyoda birinchi marta chiqindi gazini ikki yirik poligonda elektr energiyasiga aylantirish loyihasi ishga tushirilganini mamlakatning iqlim o‘zgarishiga qarshi kurashishga qat’iy intilayotganiga misol qilib ko‘rsatish mumkin. Tadbir yakunida chiqindilarni birgalikda o‘zaro manfaatli va samarali boshqarish bo‘yicha qator takliflar bildirildi, shuningdek, O‘zbekistonning BMT va a’zo davlatlar bilan mas’uliyatli ishlab chiqarish va iste’molni ta’minlash sohasida, shu jumladan, “Nol chiqindi” tashabbusini ilgari surishda hamkorlikni yanada rivojlantirishga tayyorligi bildirildi.
Izoh (0)