Toshkentda bir erkakni “uchrashuv”da kaltaklab, uning pullari olib, ust-boshini yechib olgan yigitlarga nisbatan jinoyat ishi qo‘zg‘atildi. Bu haqda IIV huzuridagi Tergov departamenti xabar berdi.
Qayd etilishicha, 17-mart kuni soat 01:30 larda Samarqand viloyatida yashovchi 33 yoshli E.D. Respublika shoshilinch tibbiy yordam ilmiy markaziga murojaat qilib, Sergeli tumani “Jaloyir” MFYda notanish shaxslar tomonidan kaltaklanganini bildirgan.
Olib borilgan tergovga qadar surishtiruv ishlari davomida mazkur holatga aniqlik kiritilganida, gumonlanuvchilar 22 yoshli R.M. va voyaga yetmagan 17 yoshli M.M. o‘zganing mulkini bosqinchilik yo‘li bilan qo‘lga kiritish maqsadida jabrlanuvchi bilan internet ijtimoiy tarmog‘i orqali tanishgani aniqlangan.
Ushbu shaxslar fuqaro E.D. Beshko‘prik ko‘chasiga chaqirib, so‘ngra uni urib unga tan jarohati yetkazib, narxi 3 million so‘mlik Honor 8A rusumli uyali telefon apparatini, qora rangli polietilen paket ichida bo‘lgan 6 million so‘m pulni, egnidagi narxi 400 ming so‘mlik sport kurtkasini, narxi 250 ming so‘mlik shimini va narxi 450 ming so‘mlik oyoq kiyimini bosqinchilik yo‘li bilan tortib olib hodisa joyidan yashirinishgan.
Tezkor-qidiruv tadbirlar natijasida gumonlanuvchilar qo‘lga olinib, ulardan bir dona Honor 8A rusumli uyali telefon apparati ashyoviy dalil tariqasida rasmiylashtirib olingan.
Mazkur holat yuzasidan Sergeli tumani IIO FMB Tergov bo‘limi tomonidan R.M. va voyaga yetmagan M.M.ga nisbatan Jinoyat kodeksining 164-moddasi 2-qismi “B” bandi (bosqinchilik) bilan jinoyat ishi qo‘zg‘atilib, ular protsessual tartibida ushlangan.
Hozirda jinoyatning kelib chiqish sabablari o‘rganilmoqda.
Izoh (0)