Тошкентда бир эркакни “учрашув”да калтаклаб, унинг пуллари олиб, уст-бошини ечиб олган йигитларга нисбатан жиноят иши қўзғатилди. Бу ҳақда ИИВ ҳузуридаги Тергов департаменти хабар берди.
Қайд этилишича, 17 март куни соат 01:30 ларда Самарқанд вилоятида яшовчи 33 ёшли Э.Д. Республика шошилинч тиббий ёрдам илмий марказига мурожаат қилиб, Сергели тумани “Жалойир” МФЙда нотаниш шахслар томонидан калтакланганини билдирган.
Олиб борилган терговга қадар суриштирув ишлари давомида мазкур ҳолатга аниқлик киритилганида, гумонланувчилар 22 ёшли Р.М. ва вояга етмаган 17 ёшли М.М. ўзганинг мулкини босқинчилик йўли билан қўлга киритиш мақсадида жабрланувчи билан интернет ижтимоий тармоғи орқали танишгани аниқланган.
Ушбу шахслар фуқаро Э.Д. Бешкўприк кўчасига чақириб, сўнгра уни уриб унга тан жароҳати етказиб, нархи 3 миллион сўмлик Honor 8А русумли уяли телефон аппаратини, қора рангли полиэтилен пакет ичида бўлган 6 миллион сўм пулни, эгнидаги нархи 400 минг сўмлик спорт курткасини, нархи 250 минг сўмлик шимини ва нархи 450 минг сўмлик оёқ кийимини босқинчилик йўли билан тортиб олиб ҳодиса жойидан яширинишган.
Тезкор-қидирув тадбирлар натижасида гумонланувчилар қўлга олиниб, улардан бир дона Honor 8А русумли уяли телефон аппарати ашёвий далил тариқасида расмийлаштириб олинган.
Мазкур ҳолат юзасидан Сергели тумани ИИО ФМБ Тергов бўлими томонидан Р.М. ва вояга етмаган М.М.га нисбатан Жиноят кодексининг 164-моддаси 2-қисми “Б” банди (босқинчилик) билан жиноят иши қўзғатилиб, улар процессуал тартибида ушланган.
Ҳозирда жиноятнинг келиб чиқиш сабаблари ўрганилмоқда.
Изоҳ (0)