Yoshlar telekanali ko‘rsatuvlarning birida Qoraqalpog‘istonni viloyat deb nomlagani uchun uzr so‘radi

Yoshlar telekanalining “Biz tomonlarda“ deb nomlangan ko‘rsatuvida Qoraqalpog‘iston Respublikasi viloyat sifatida tilga olindi. Buning uchun telekanal masʼullari uzr so‘rab, xatolikka yo‘l qo‘yganlarga nisbatan chora ko‘rilishini bildirdi.

“Bugun telekanalimiz faoliyatida juda kamdan kam uchraydigan qo‘pol xatolikka yo‘l qo‘yildi. ‘Yoshlar’ telekanali orqali soat 12:05 da Qoraqalpog‘iston Respublikasidan tayyorlangan ‘Biz tomonlarda’ ko‘rsatuvi namoyish etilgan edi. Ko‘rsatuvda montaj jarayonidagi texnik xatolik sababli Qoraqalpog‘iston Respublikasining nomi xato ko‘rsatilgan. Ushbu qo‘pol xatolikka yo‘l qo‘yilgani uchun biz ‘Yoshlar’ telekanali jamoasi ko‘p sonli teletomoshabinlarimizdan uzr so‘raymiz. Hozir aybdorlarga nisbatan tegishli choralar ko‘rilmoqda”, — deyiladi telekanal boshlovchilarining navbatdagi chiqishida.

Qo‘shimcha qilinishicha, mazkur ko‘rsatuv “Qoraqalpog‘iston Respublikasi”ning nomi to‘g‘rilangan holda qayta namoyish etilgan.

“Kelgusida telekanalimizda bu kabi holatlarning takrorlanmasligi yuzasidan qatʼiy choralar ko‘riladi”, — deydi telekanal boshlovchilari.