O‘zbekiston qurilish bozoriga BAAdan investorlarni jalb etadi
O‘zbekistonning Dubaydagi Bosh konsulligi xodimlari “ISTA GOSTAR TOOS” qurilish kompaniyasi menejeri Habib Toosi bilan uchrashuv o‘tkazdi. Bu haqda “Dunyo” agentligi xabar berdi.
Qayd etilishicha, muloqot davomida BAAdan O‘zbekistonga investitsiyalarni jalb etish, yangi innovatsion qurilish texnologiyalarini olib kirish hamda turli obyektlarni qurish masalalari muhokama qilingan.
Diplomatlar investorlarni O‘zbekistonda hayotga tadbiq etilayotgan keng ko‘lamli islohotlar va ishbilarmon doira vakillariga qaratilayotgan alohida eʼtibor hamda xorijiy sarmoyadorlar uchun yaratilgan shart-sharoitlar bilan tanishtirgan. O‘zbekiston iqtisodiyotining turli jabhalarida loyihalarni amalga oshirish uchun xorijiy sarmoyalarni kiritish ikki tomon uchun manfaatli bo‘lishi taʼkidlangan.
Suhbat yakunida tomonlar O‘zbekistonda investorlarga yaratilgan shart-sharoitlar bilan bevosita tanishish maqsadida ushbu kompaniya rahbariyatining mamlakatga ishchi safarini tashkil etish to‘g‘risida kelishuvga erishilgan.
Avvalroq O‘zbekiston hududlarining iqtisodiyotni sanoatlashtirish dinamikasi tahlil qilingani, Xitoy kompaniyasi O‘zbekistonda shahar va transport infratuzilmasini qurishda ishtirok etmoqchiligi to‘g‘risida xabar berilgandi.
