O‘zbekiston terma jamoasi mart oyidagi FIFA kunlarida ikkita o‘rtoqlik o‘yini o‘tkazdi. Saudiya Arabistonida o‘tgan yig‘in mobaynida Boliviya terma jamoasi mag‘lub etilgan (1:0) bo‘lsa, Venesuela bilan durang qayd etildi (1:1).
Boliviyaga qarshi o‘yindagi yutuq O‘zbekiston terma jamoasi tarixida Janubiy Amerika vakili ustidan qozonilgan ilk g‘alaba bo‘ldi. Bunga qadar “oq bo‘rilar” KONMEBOL mintaqasi terma jamoalarini mag‘lub etolmagandi.
Srechko Katanes O‘zbekiston terma jamoasi boshqaruvidagi 16-o‘yinni o‘tkazdi. Ularda jamoa 10 g‘alaba, 4 mag‘lubiyat va ikkita durang qayd etdi. To‘plar nisbati — 32:13.
Qayd etish kerak, mazkur 16 ta o‘yinning faqat uchtasi rasmiy maqomga ega bo‘lgan. Qolgan 13 ta o‘yinda O‘zbekiston o‘rtoqlik uchrashuvlarida ishtirok etgan.
Katanes terma jamoa bilan 10 ta g‘alaba qayd etgan 7-murabbiyga, O‘zbekiston boshqaruvida 15+ o‘yin o‘tkazgan 8-mutaxassisga aylandi.
O‘rtoqlik o‘yinlarida ishtirok etish (13) borasida esa Katanes O‘zbekiston terma jamoalari murabbiylari orasida to‘rtinchi o‘ringa chiqib oldi. Faqat Rauf Ineleyev (15), Vadim Abramov (22) va Mirjalol Qosimov (24) bu borada undan oldinda.
Avvalroq Eldor Shomurodov O‘zbekiston terma jamoasidagi 34-golini urgan holda Maksim Shatskixning rekordini takrorlagani haqida xabar qilingandi.
Izoh (0)