Жанубий Америка вакили устидан қозонилган илк ғалаба, Катанец бошқарувидаги 16-ўйин. Ўзбекистон терма жамоасининг март ойидаги ўйинларига оид рақамлар

Ўзбекистон терма жамоаси март ойидаги ФИФА кунларида иккита ўртоқлик ўйини ўтказди. Саудия Арабистонида ўтган йиғин мобайнида Боливия терма жамоаси мағлуб этилган (1:0) бўлса, Венесуэла билан дуранг қайд этилди (1:1).

Боливияга қарши ўйиндаги ютуқ Ўзбекистон терма жамоаси тарихида Жанубий Америка вакили устидан қозонилган илк ғалаба бўлди. Бунга қадар “оқ бўрилар” KONMEBOL минтақаси терма жамоаларини мағлуб этолмаганди.

Сречко Катанец Ўзбекистон терма жамоаси бошқарувидаги 16-ўйинни ўтказди. Уларда жамоа 10 ғалаба, 4 мағлубият ва иккита дуранг қайд этди. Тўплар нисбати — 32:13.

Қайд этиш керак, мазкур 16 та ўйиннинг фақат учтаси расмий мақомга эга бўлган. Қолган 13 та ўйинда Ўзбекистон ўртоқлик учрашувларида иштирок этган.

Катанец терма жамоа билан 10 та ғалаба қайд этган 7-мураббийга, Ўзбекистон бошқарувида 15+ ўйин ўтказган 8-мутахассисга айланди.

Ўртоқлик ўйинларида иштирок этиш (13) борасида эса Катанец Ўзбекистон терма жамоалари мураббийлари орасида тўртинчи ўринга чиқиб олди. Фақат Рауф Инелеев (15), Вадим Абрамов (22) ва Миржалол Қосимов (24) бу борада ундан олдинда.

Аввалроқ Элдор Шомуродов Ўзбекистон терма жамоасидаги 34-голини урган ҳолда Максим Шацкихнинг рекордини такрорлагани ҳақида хабар қилинганди.