Yevropa Ittifoqi a’zo davlatlarga yangi energiya sanksiyalarisiz Rossiyadan suyultirilgan gaz (LNG) importini taqiqlash imkoniyatini izlamoqda. Bu haqda Bloomberg xabar bermoqda.
Agentlik maʼlumotlariga ko‘ra, vazirlar rossiyalik eksportchilarga LNG yetkazib berish uchun zarur bo‘lgan Yevropa davlatlarining infratuzilma quvvatlarini oldindan zaxiraga qo‘yishni vaqtincha taqiqlash huquqini beruvchi tashabbusni maʼqullashga tayyor.
Bloomberg’ning ta’kidlashicha, taklif Yevroparlament tomonidan ma’qullansa, kuchga kiradi. Tashabbus mualliflari Finlyandiya, Estoniya, Latviya, Litva va Polsha bo‘ldi, deya xabar beradi agentlik.
9-mart kuni Yevrokomissiya bozorni “ishonchli” yetkazib beruvchilar uchun bo‘shatish maqsadida Rossiyadan LNG sotib olish bo‘yicha shartnomalarni uzaytirmaslikni taklif qildi.
Energetika bo‘yicha Yevropa komissari Kadri Simsonning so‘zlariga ko‘ra, Rossiyadan suyultirilgan gazni xarid qilishni davom ettirish yevropalik iste’molchilarga “obro‘-e’tibor uchun xavf” hisoblanadi.
Rossiyaning LNG uchun amaldagi uzoq muddatli shartnomalari 2030-yildan keyin tugaydi.
Tahlilchilarning fikriga ko‘ra, Rossiya o‘z LNG’sini Osiyoning tanqis bozorlariga yo‘naltira oladi va LNG importini taqiqlash g‘oyasini amalda qo‘llash qiyin bo‘ladi.
Izoh (0)