Toshkent shahar Yashnobod tumanida korxona bosh hisobchisi rahbarining 3,9 milliard so‘mini o‘zlashtirib olgani aniqlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, holat Bosh prokuratura huzuridagi departamentning Yashnobod tuman bo‘limi tomonidan tadbirkorlik subyektlarining huquqlarini himoya qilish yuzasidan o‘tkazilgan tergovga qadar tekshiruvda aniqlangan. “S.G.” MCHJ bosh hisobchisi Ye.K. tijorat banki filialidan bank-mijoz dasturidan foydalanish uchun ushbu MCHJga berilgan elektron kalitdan foydalanib, oylik ish haqidan tashqari qo‘shimcha 3,9 milliard so‘mini o‘ziga avans sifatida hisoblagan va plastik kartasiga o‘tkazish yo‘li bilan talon-toroj qilgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)