Rossiyalik investorlar Markaziy Osiyo bozorlariga qiziqmoqda

Rossiyalik investorlar uchun Markaziy Osiyo poytaxtlaridagi bozorlarning 35 foizi qiziqish uyg‘otadi. Bu haqda “Izvestiya” nashriga “Atlas” tahlilchilari ma’lum qildi.

Gap Olmaota (Qozog‘iston), Toshkent (O‘zbekiston), Dushanbe (Tojikiston) va Bishkekdagi (Qirg‘iziston) mintaqaviy ahamiyatga ega yopiq bozorlar haqida ketmoqda, ular xalqaro amaliyotda ko‘pincha aralash obyektlarga aylantiriladi, deya tushuntiradi tahlilchilar. 

Mutaxassislarga ko‘ra, Markaziy Osiyodagi bozorlar oddiy savdo markazlaridan qishloq xo‘jaligi mahsulotlarining keng assortimenti, mahalliy ishlab chiqaruvchilarning noyob tovarlari va norasmiy muhit bilan ajralib turadi.

“Markaziy Osiyo mamlakatlarida anʼanaviy bozorlar chakana savdoning salmoqli ulushini — umumiy aylanmaning o‘rtacha 20-40 foizini egallashda davom etmoqda. Masalan, O‘zbekistonda yo‘lga qo‘yilgan xususiylashtirish jarayoni mahalliy va xalqaro investorlarga bozorlarning iqtisodiy va sayyohlik salohiyatidan foydalanishda keng imkoniyatlar ochmoqda”, — deydi Atlas byurosi asoschisi va bosh direktori Aleksandra Sitnikova.

Uning so‘zlariga ko‘ra, 2010-yillarda boshlangan Moskva bozorlarini rekonstruksiya qilish asosiy obyektlar — Dorogomilovskiy, Usachevskiy, Danilovskiyni tashrif va daromadning yangi darajasiga olib keldi. 

Markaziy Osiyo bozorlarini rekonstruksiya qilish muvaffaqiyati ularning madaniy-tarixiy ahamiyati va gastroturizmning global tendensiyasi tufayli yanada hayratlanarli bo‘lishi mumkin, deya qo‘shimcha qildi Sitnikova.

CMWP ekspertlarining fikriga ko‘ra, rossiyalik investorlar MDH mamlakatlari ko‘chmas mulk bozorlariga qiziqish bilan qarashmoqda. 

Hamkor, CMWP strategik konsalting departamenti rahbari Yuliya Tokareva investitsiyalar hajmi potensial loyihaga — bozorni rekonstruksiya qilish parametrlariga, qo‘shni hududlarni obodonlashtirishga, qo‘shimcha funksiyalarga ega kapital binolarni qurishga bog‘liqligini tushuntirdi.

“Biz Toshkentdagi 3-4 gektar maydonda joylashgan faraziy loyihani baholadik. Rekonstruksiya qilingan bozor maydoni 15 ming kvadrat metrni tashkil etishini hisobga oldik. Yangi qurilish hajmi esa 5 ming kvadrat metr bo‘ladi. Shuningdek, hududni obodonlashtirish rejalashtirilgan, keyin taxminan 20 million dollarlik investitsiyalar hajmi haqida gapirish mumkin", — deydi Tokareva.

2022-yilda Rossiyaning Markaziy Osiyoga to‘g‘ridan-to‘g‘ri investitsiyalari 2021-yilga nisbatan oshgan.