O‘zbekiston Markaziy Osiyoda yagona to‘lov tizimini yaratishni taklif qildi. Investitsiyalar, sanoat va savdo vazirligining xabar qilishicha, bu masala 17-mart kuni bo‘lib o‘tgan AQSH va Markaziy Osiyo mamlakat hukumatlari o‘rtasida savdo va investitsiyalar bo‘yicha Hadli bitim (TIFA) kengashi yig‘ilishida aytib o‘tildi.
Samarqandda o‘tkazilgan ushbu yig‘ilish AQSH Savdo vakili idorasi (USTR) va Tijorat huquqini rivojlantirish dasturi (CLDP) Departamenti ko‘magida tashkil qilingan. Tadbirda O‘zbekiston, AQSH, Qozog‘iston, Qirg‘iziston, Tojikiston, Turkmaniston va Pokistonning tegishli vazirlik va idoralari delegatsiyalari ishtirok etdi.
Investitsiyalar, sanoat va savdo vaziri Laziz Qudratov Markaziy Osiyo mamlakatlari o‘rtasida savdo-iqtisodiy, sarmoyaviy, transport va boshqa sohalarda hamkorlik qilish uchun keng imkoniyatlar mavjudligini taʼkidladi.
Shu nuqtayi nazardan, ishga solinmagan resurs va imkoniyatlardan foydalangan holda birgalikda chora-tadbirlar ko‘rish, jumladan, Markaziy Osiyo davlatlarining elektron tijorat to‘g‘risidagi qonun hujjatlarini birxillashtirish va yagona mustaqil arbitraj tizimini yaratish, yagona to‘lov tizimiga ega bo‘lgan tovar va xizmatlar yetkazib beruvchilar uchun mintaqaviy platformani yaratish, xavflarni prognozlash va boshqarish maqsadida Data-center’lar hamda eksport va import qiluvchilar bazalarini yaratish, sanitariya-epidemiologiya osoyishtaligini taʼminlashni taklif etdi.
Qishloq xo‘jaligi mahsulotlarini sertifikatlashning elektron tizimlarini, CLDP tavsiyalariga asoslangan bojxona qoida va tartibotlarini joriy etish, fitosanitariya talablarini uyg‘unlashtirish, ilg‘or tajriba almashish, mintaqada xotin-qizlarning iqtisodiy imkoniyatlarini kengaytirish bo‘yicha tashabbuslar ham bildirildi.
Tadbir yakunlari bo‘yicha ishtirokchilarning savdo-iqtisodiy va sarmoyaviy hamkorlikni yanada mustahkamlash bo‘yicha umumiy qarashlari, muhokama qilingan loyiha va tashabbuslarni amalga oshirish chora-tadbirlari o‘z ifodasini topgan qo‘shma bayonot qabul qilindi.
Izoh (0)