Qirg‘iziston poytaxtida Islandiyaning faxriy konsulxonasi ochildi. Rasmiy ochilish marosimida Qirg‘iziston respublikasi tashqi ishlar vaziri o‘rinbosari Almaz Imangaziyev va Islandiyaning Qirg‘izistondagi elchisi Aurni Tor Sigurdsson ishtirok etdi. Bu haqda Qirg‘iziston Tashqi ishlar vazirligi matbuot xizmatiga tayanib, “Daryo”ning respublikadagi muxbiri xabar berdi.
Qirg‘izistonlik diplomat Bishkekda Islandiyaning faxriy konsulxonasi ochilishi bilan tabrikladi. U ushbu qadam mamlakatlar o‘rtasidagi xalqaro munosabatlarni faollashtirish imkonini berishiga ishonch bildirdi.
Uchrashuvda Imangaziyev elchiga Qirg‘iziston respublikasidagi gidroenergetika loyihalari haqida so‘zlab berdi.
Sigurdsson Islandiya ikki tomonlama hamkorlikning turli jihatlari, jumladan, savdo aloqalaridan manfaatdor ekanini ta’kidladi.
Fransiya, Shveysariya, Italiya bilan diplomatik pasport egalari uchun viza talablarini bekor qilish bo‘yicha tuzilgan kelishuvlarni inobatga olgan holda, qirg‘iz diplomati Islandiya bilan ham shunday xalqaro shartnoma tuzish imkoniyatini ko‘rib chiqishni taklif qildi.
Elchi bu masala Islandiya tomoni bilan muhokama qilinayotganini qayd etdi. Bundan tashqari, Islandiya Bishkek va Reykyavik o‘rtasida havo transporti va ikki tomonlama soliqqa tortishni bekor qilish bo‘yicha o‘zaro kelishuvlardan manfaatdor ekani qayd etildi.
Yaqin orada Islandiyada ham Qirg‘izistonning faxriy konsulxonasi ochilishi mumkin.
Korotovskix Yevgeniy, Bishkek
Izoh (0)