Tojikistondagi zilzila oqibatida 3 kishi jabrlandi, 60 dan ortiq chorva mollari nobud bo‘ldi
Tojikistonda 23-martga o‘tar kechasi sodir bo‘lgan zilzilalar oqibatida 3 kishi tan jarohati oldi, 60 dan ortiq chorva mollari nobud bo‘ldi, deb xabar bermoqda “Asia-Plus” nashri.
Zilzila epimarkazi bo‘lgan Tojikistonning So‘g‘d viloyati Ko‘xistoni-Mastcho‘x tumanida yashovchi ikki erkak va bir ayol yengil tan jarohati olgan. 14 bosh qoramol, 52 qo‘y va 2 nafar ot nobud bo‘lgan.
Rasht tumani Takoba qishloq fuqarolar yig‘inining Porvog‘, Duoba, Saridasht va Takoba qishloqlarida 27 ta turar joy binosi qisman shikastlangan — devorlarda yoriqlar aniqlangan.
Tegirmi qishlog‘ida zilzila oqibatida ikkita turar joy binosi jiddiy zarar ko‘rgan, 10 ta uy, bitta ta’lim muassasasi va tuman ijroiya hokimiyati binosiga qisman zarar yetgan.
Sangvor tumani, Tavildara jamoatidagi Farking qishlog‘ida bitta turar joy binosiga qisman shikast yetgan — devorlarda yoriqlar hosil bo‘lgan.
Turar joy binolari va yordamchi xo‘jaliklarga yetkazilgan zarar miqdori aniqlanmoqda.
Tojikistonda 23-mart kuni Toshkent vaqti bilan soat 01:07 da qayd etilgan 6 magnitudali zilzila O‘zbekistonning qator viloyatlarida ham sezilgan, uning kuchi 4-5 ballni tashkil etgandi. Respublikada 23-mart kuni Toshkent vaqti bilan 07:53 da qayd etilgan 4,9 magnitudali yangi zilzila ham O‘zbekistonda 2-3 ball oralig‘ida sezilgan.
