O‘zbekistonlik mehnat muhojirlari Qozog‘istonda ishlayotgan xorijliklar beshligiga kirdi

O‘zbekiston qo‘shni Qozog‘iston Respublikasini ishchi kuchi bilan ta’minlash borasida beshinchi o‘rinda turadi. Qozog‘istonga ishlash uchun keladigan muhojirlarning ko‘chiligini xitoyliklar tashkil qiladi — 3411 kishi. 1-mart holatiga ko‘ra, Qozog‘iston respublikasida jami 13,4 ming nafar xorij fuqarosi mehnat qilmoqda, deb xabar berdi “Daryo”ning Qozog‘istondagi muxbiri respublika Mehnat va aholini ijtimoiy muhofaza qilish vazirligi matbuot xizmatiga tayanib. Vazirlik har yili xorijiy mutaxassislarni jalb qilish uchun kvotani belgilaydi va taqsimlaydi — bu yil uchun 22 226 kishi (0,24 foiz).

Vazirlik chet elliklarga to‘rt toifada ishlash uchun ruxsatnomalar bergan. Bular: rahbarlar va ularning o‘rinbosarlari, tarkibiy bo‘linmalar rahbarlari, mutaxassislar va malakali ishchilardir. Ushbu ro‘yxatda eng ko‘p o‘rinni mutaxassislar egallaydi  —7199 kishi, eng kami esa rahbarlar va o‘rinbosarlar (565 ta ruxsatnoma). Shuningdek, 400 nafarga yaqin kishi mavsumiy ishlar bilan band.

Aksariyat xorijliklar qurilish, tog‘-kon sanoati va karyerlarda ishlaydi. Kasbiy, ilmiy va texnik faoliyatda, ishlab chiqarishda, shuningdek, qishloq, o‘rmon va baliq xo‘jaligida mehnatga muhojirlar soni ancha kam.

Qozog‘istonga ishlash uchun asosan Xitoy, Hindiston, Turkiya, Buyuk Britaniya va O‘zbekistondan chet elliklar keladi. Hozir respublikada 1640 nafar ish beruvchi xorijlik migrantlar xizmatidan foydalanmoqda. Qayd etish joizki, xodimlarning 96 foizi Qozog‘iston respublikasi fuqarolaridir.

Svetlana Shesternyova, Olmaota