Россиялик инвесторлар учун Марказий Осиё пойтахтларидаги бозорларнинг 35 фоизи қизиқиш уйғотади. Бу ҳақда “Известия” нашрига “Atlas” таҳлилчилари маълум қилди.
Гап Олмаота (Қозоғистон), Тошкент (Ўзбекистон), Душанбе (Тожикистон) ва Бишкекдаги (Қирғизистон) минтақавий аҳамиятга эга ёпиқ бозорлар ҳақида кетмоқда, улар халқаро амалиётда кўпинча аралаш объектларга айлантирилади, дея тушунтиради таҳлилчилар.
Мутахассисларга кўра, Марказий Осиёдаги бозорлар оддий савдо марказларидан қишлоқ хўжалиги маҳсулотларининг кенг ассортименти, маҳаллий ишлаб чиқарувчиларнинг ноёб товарлари ва норасмий муҳит билан ажралиб туради.
“Марказий Осиё мамлакатларида анъанавий бозорлар чакана савдонинг салмоқли улушини — умумий айланманинг ўртача 20-40 фоизини эгаллашда давом этмоқда. Масалан, Ўзбекистонда йўлга қўйилган хусусийлаштириш жараёни маҳаллий ва халқаро инвесторларга бозорларнинг иқтисодий ва сайёҳлик салоҳиятидан фойдаланишда кенг имкониятлар очмоқда”, — дейди Atlas бюроси асосчиси ва бош директори Александра Ситникова.
Унинг сўзларига кўра, 2010 йилларда бошланган Москва бозорларини реконструкция қилиш асосий объектлар — Дорогомиловский, Усачевский, Даниловскийни ташриф ва даромаднинг янги даражасига олиб келди.
Марказий Осиё бозорларини реконструкция қилиш муваффақияти уларнинг маданий-тарихий аҳамияти ва гастротуризмнинг глобал тенденцияси туфайли янада ҳайратланарли бўлиши мумкин, дея қўшимча қилди Ситникова.
CМWP экспертларининг фикрига кўра, россиялик инвесторлар МДҲ мамлакатлари кўчмас мулк бозорларига қизиқиш билан қарашмоқда.
Ҳамкор, CМWP стратегик консалтинг департаменти раҳбари Юлия Токарева инвестициялар ҳажми потенсиал лойиҳага — бозорни реконструкция қилиш параметрларига, қўшни ҳудудларни ободонлаштиришга, қўшимча функцияларга эга капитал биноларни қуришга боғлиқлигини тушунтирди.
“Биз Тошкентдаги 3-4 гектар майдонда жойлашган фаразий лойиҳани баҳоладик. Реконструкция қилинган бозор майдони 15 минг квадрат метрни ташкил этишини ҳисобга олдик. Янги қурилиш ҳажми эса 5 минг квадрат метр бўлади. Шунингдек, ҳудудни ободонлаштириш режалаштирилган, кейин тахминан 20 миллион долларлик инвестициялар ҳажми ҳақида гапириш мумкин", — дейди Токарева.
2022 йилда Россиянинг Марказий Осиёга тўғридан-тўғри инвестициялари 2021 йилга нисбатан ошган.
Изоҳ (0)