Futbol bo‘yicha Ispaniya La Ligasining 26-turida “Barselona” va “Real” jamoalari o‘zaro to‘qnash keldi va unda kataloniyaliklar 2:1 hisobida g‘alaba qozondi.
“Barselona” ketma-ket uchinchi marta “Real” ustidan zafar quchdi. Bunga qadar Xavi shogirdlari Ispaniya Kubogida (1:0) va Ispaniya Superkubogida (3:1) madridliklarni mag‘lub etgandi. “Ko‘k-anorranglilar” so‘nggi bor 2011-yilda xuddi shunday natija qayd etgandi. U vaqtda “Barselona” bosh murabbiyi Gvardiola, “Real” bosh murabbiyi esa Joze Mourinyo edi.
Xavi jamoasi raqib darvozasi tomoni 17 ta zarba berdi, ulardan 7 tasi aniq. Madridliklar esa 11 ta zarba yo‘lladi va ulardan 3 tasi darvozaga aniq bordi. To‘pga egalik qilish bo‘yicha ustunlik “Barselona” tomonda — 54%-46%.
Xavi Karlo Anchelotti bilan oltinchi marta to‘qnash kelmoqda va ularning 4 tasida ispaniyalik mutaxassis g‘alaba qozondi. Italiyalik murabbiyda esa ikkita g‘alaba mavjud.
“Barselona” “El-klasiko”lar tarixidagi 100-g‘alabasini qo‘lga kiritdi. Jamoalar o‘zaro 253-marta to‘qnash keldi. Ulardan 101 tasida “Real”ning qo‘li baland kelgan. Qolgan 52 ta uchrashuvda durang natija qayd etilgan.
Izoh (0)