Туркия Финляндиянинг НАТОга аризасини тасдиқлаш жараёнини бошлади. Бу масала Туркия парламентида кўриб чиқилади, деб маълум қилди Туркия президенти Ражаб Тоййиб Эрдўғон. У Анқара ҳар доим НАТОнинг “очиқ эшиклар” сиёсатини қўллаб-қувватлаб келганини таъкидлади.
Туркия раҳбарининг сўзларига кўра, Финляндия Анқаранинг хавфсизлик муаммоларини ҳал қилиш бўйича “самимий ва аниқ қадамларни” ташлаган.
“НАТОга аъзолик аризаларини алоҳида-алоҳида кўриб чиқиш тўғрисидаги қарор Финляндия террорчилар акцияларидан ҳоли экани сабабли қабул қилинди, Швеция ҳақида бундай деб бўлмайди”, — деди Эрдўғон Анқарада финляндиялик ҳамкасби Саули Ниинисте билан қўшма матбуот анжуманида.
Эрдўғон Финляндиянинг НАТОга кириши ҳақидаги аризаси Туркияда май ойида бўладиган сайловлар олдидан парламент томонидан маъқулланишига умид билдирди. “Ишончим комилки, Финляндия НАТО сафида глобал хавфсизлик ва барқарорликка катта ҳисса қўшади”, — деди у.
Сиёсатчи, шунингдек, Туркия Анқаранинг Европа Иттифоқига тўлақонли аъзоликка номзодини қўллаб-қувватлаш масаласида Финляндия позициясини муҳим деб билишини таъкидлади.
Туркия президенти Швециянинг алянсга қўшилиш ҳақидаги аризасига тўхталар экан, Стокгольм билан НАТОга ариза бериш бўйича музокаралар алянс тамойиллари нуқтаи назаридан ва Анқаранинг терроризмга қарши кураш мавзусига муносабатини ҳисобга олган ҳолда давом этишини айтди.
“Анқара Стокгольмга 120 нафар террорчи рўйхатини топширган. Бу жиноятчилар Туркияга экстрадиция қилинмасдан туриб, НАТОга аъзолик аризасига ижобий муносабат бўлиши мумкин эмас. Терроризмга қарши кураш масаласи — Туркия учун ъқизил чизиқъ. Анқаранинг Стокгольм аризасига муносабатини Швеция томонидан ташланадиган аниқ қадамлар белгилайди”, — деб тушунтирди Эрдўғон.
Швеция ва Финляндия НАТОга аъзо бўлиш учун биргаликда ариза берган
2022 йилнинг май ойида Швеция ва Финляндия НАТОга аъзо бўлиш учун расмий ариза топширган эди. Бунгача ҳар икки давлат ҳарбий бетарафлик сиёсатига амал қилган. Алянсга қўшилиш учун ариза бериш тўғрисидаги қарор Россиянинг Украинадаги босқини фонида қабул қилинган.
Швеция ва Финляндиянинг НАТОга аъзо бўлиши учун алянснинг барча аъзолари уларнинг аризаларини қўллаб-қувватлашлари керак. Иттифоқнинг 30 аъзосидан фақат Венгрия ва Туркия аризаларни ратификация қилмаган. Анқара айни пайтда икки давлатга ўз ҳудудидаги курд гуруҳларини қўллаб-қувватлашни тўхтатиш талабини илгари сурди. Туркия расмийлари, шунингдек, Швециядан “террорчиликда гумонланувчиларни” Анқарага экстрадиция қилишни талаб қилди. Кейинчалик Туркия Швеция бу талабларни бажармаганини бир неча бор таъкидлади.
Уч давлат ўртасидаги музокаралар январь ойида Стокгольмда Қуръонни ёқиш акциясидан сўнг Анқара томонидан тўхтатилган эди. 9 март куни музокаралар қайта бошланди.
Изоҳ (0)