Shvetsiyaning NATOga kirish jarayoni Qur’onni yoqish aksiyalari tufayli vaqtincha to‘xtatildi

Shvetsiya tashqi ishlar vaziri Tobias Billstryom Qur’onning yoqilishi bilan bog‘liq harakatlar fonida mamlakatning NATOga a’zo bo‘lish jarayoni to‘xtatilganini aytdi. U iyul oyida Vilnyusda boʻlib oʻtadigan NATO mamlakatlari Tashqi ishlar vazirliklari sammitida alyansga qoʻshilish borasida Turkiya bilan kelishib olishga umid bildirdi.

“O‘tgan bir necha haftadagi voqealar NATOga a’zo bo‘lish jarayonini vaqtincha to‘xtatdi... Albatta, biz Vilnyusdagi sammitni intiqlik bilan kutmoqdamiz”, — dedi Tobias Billstryom Expressen gazetasiga. NATOning navbatdagi sammiti 2023-yil 11—12-iyul kunlari Vilnyusda bo‘lib o‘tadi.

21-yanvar kuni daniyalik o‘ta o‘ngchi siyosatchi Rasmus Paludan (u Shvetsiya fuqaroligiga ham ega) Turkiyaning Stokgolmdagi elchixonasi oldida Qur’onni yoqib yubordi. Oradan bir hafta o‘tib, Kopengagendagi Turkiya elchixonasi oldida ham Qur’on yoqildi. Aftonbladet nashriga bergan intervyusida faol Shvetsiya NATOga qabul qilinmaguncha har juma kuni Turkiya elchixonasi oldida Qur’onni yoqishga va’da bergan.

Turkiya hukumati Qur’onning yoqilishni nafrat asosida qilingan jinoyat, deb bilmoqda. Shvetsiya rasmiylari bunday harakatlarga to‘sqinlik qilmayotgani sababli Turkiya prezidenti Rajab Toyyib Erdo‘g‘on Shvetsiyaning NATOga kirish haqidagi arizasini qo‘llab-quvvatlashdan bosh tortdi.