Тошкент шаҳрида 17 март куни Ўзбекистон президенти ҳузуридаги Хавфсизлик кенгаши аппарати ва Қирғизистон Хавфсизлик кенгаши котибияти ўртасида маслаҳатлашув бўлиб ўтди.
Ўзбекистон томондан Виктор Маҳмудов, Қирғизистон томондан Марат Имонқулов раислигида кечган тадбирда давлатлар ўртасидаги стратегик шериклик муносабати ўзаро ишонч ва ҳурмат, бир-бири манфаатларини ҳисобга олиш ва конструктив мулоқот тамойиллари асосида ривожланаётгани қайд этилди.
“Бугунги таҳликали даврда учрайдиган ҳеч бир муаммони муайян мамлакатнинг ўзи мустақил ҳал қила олмайди. Шу боис барча соҳалар қатори хавфсизлик билан боғлиқ масалаларни ҳал этишда ҳам ҳамкорлик жуда муҳим. 2019 йилда бўлиб ўтган маслаҳатлашувнинг биринчи даврасидан сўнг ўзаро алоқаларимиз сезиларли даражада чуқурлашди. Бугунги музокараларимиз шериклигимизни янада мустаҳкамлайди, деган умиддамиз”, — дейди Марат Имонқулов.
Томонлар конструктив ҳамкорликни бундан кейин ҳам қўллаб-қувватлашга содиқлигини, хавфсизлик соҳасидаги Ўзбекистон—Қирғизистон шериклигини, жумладан, шартномавий-ҳуқуқий базани мустаҳкамлаш, биргаликдаги амалий саъй-ҳаракатлар механизмини мувофиқлаштириш орқали ривожлантиришга қатъий тайёр эканини тасдиқлади. Учрашув якунида хавфсизликни таъминлаш соҳасидаги ҳамкорликни янада кенгайтириш ва чуқурлаштиришга қаратилган аниқ йўналишлар, чора-тадбирлар белгиланган маслаҳатлашув протоколи имзоланди.
Изоҳ (0)