O‘zbekiston—Qozog‘iston—Xitoy-Laos—Tailand—Malayziya transport koridori tashkil etilishi mumkin. “Dunyo” AA xabariga ko‘ra, bu masala Tailandda muhokama qilindi.
Qayd etilishicha, O‘zbekistonning Bangkokdagi Bosh konsuli Faxriddin Sultonov Tailandda ish safari bilan bo‘lib turgan Laos Jamoat ishlari va transport vazirligi Rejalashtirish va moliya departamenti bosh direktori Van Dilafan boshchiligidagi delegasiya bilan uchrashuv o‘tkazdi.
Suhbat davomida tomonlar O‘zbekistonda Janubi–Sharqiy Osiyo mamlakatlari bilan savdo-iqtisodiy hamkorlikni kengaytirish masalalarini muhokama qildi.
O‘zbekiston vakili Xitoy va Laos o‘rtasida temiryo‘l transportida yuk tashuvlari va O‘zbekiston—Qozog‘iston—Xitoy—Laos—Tailand—Malayziya transport koridorini tashkil etish imkoniyatlari o‘rganib chiqilayotganini ma’lum qildi.
Laos Jamoat ishlari va transport vazirligi departamenti bosh direktori Markaziy Osiyo davlatlari bilan Laos orqali o‘tuvchi transport koridorini tashkil etish masalasini o‘rganishga tayyorligini bildirdi.
Uchrashuv yakunida Laos orqali temiryo‘l transportida yuk tashuvlari borasida talablar va qo‘shma loyihalarni amalga oshirish imkoniyatlarini muhokama qilish maqsadida O‘zbekistonning tegishli vazirlik va idoralari delegasiyasini ushbu mamlakatga xizmat safarini tashkil etish bo‘yicha kelishib olindi.
Izoh (0)