Islom taraqqiyot bankining (ITB) O‘zbekistondagi monitoring missiyasi delegatsiya rahbari Vaxyu Vijayanto Qoraqalpog‘iston Vazirlar Kengashi raisi Farhod Ermanov hamda Iqtisodiyot va moliya vazirligining loyihani amalga oshirish guruhi vakillari bilan uchrashdi. Bu haqda BMT Taraqqiyot dasturi matbuot xizmati xabar berdi.
Qayd etilishicha, uchrashuv davomida tomonlar Qoraqalpog‘istonning maqsadli hududlarida “Qishloq joylarni barqaror rivojlantirish” loyihasining borishi va tashabbuslarni amalga oshirishdagi muammolarni muhokama qilgan. Undan ko‘zlangan asosiy maqsad mahalliy aholining faol ishtiroki orqali qishloq hududlarini rivojlantirishdan iborat.
Qoraqalpog‘istonda, Buxoro, Navoiy va Xorazmdagi mazkur loyihani amalga oshirish uchun ITB jami 200 million dollar ajratgan.️ Bugungi kunga qadar loyiha 113 ta qishloqni rivojlantirish rejalarini ishlab chiqqan.
Ulardan 31 tasi Qoraqalpog‘istonning 5 ta tumanidagi 160 ta ijtimoiy infratuzilma obyektlarini yaxshilashga qaratilgan.
“Loyihaning kutilayotgan taʼsiri qashshoqlikni inklyuziv qisqartirish va barqaror o‘sish orqali iqtisodiy rivojlanishni rag‘batlantirish bo‘yicha milliy rivojlanish maqsadiga erishishga hissa qo‘shishdan iborat. Loyiha samarasi qishloq aholisi farovonligini oshirish, iqtisodiy daromad olish imkoniyatlarini yaratishdir”, — deyiladi loyiha tavsifida.
Loyiha maqsadi:
- Mahalliy hamjamiyatlarning o‘z manfaatlarini aniqlash, qiziqish va ehtiyojlarni namoyish etish salohiyatini kuchaytirish;
- Mahalliy arxitektura, loyiha institutlari va hududiy qurilish boshqarmalari vakillarini tayyorlash;
- Gender jihatlarini hisobga olgan holda innovatsion IT-yechimlar va raqamli transformatsiyani amalga oshirish uchun qurilish sektori va arxitektura dizayni salohiyatini rivojlantirish;
- Barqaror infratuzilmani ta'minlash uchun qarorlar qabul qilish jarayonlariga mahalliy hamjamiyatlarni jalb qilish.
Avvalroq Islom taraqqiyot bankining O‘zbekistonda maktablar qurish va ta’mirlashga mablag‘ ajratishni rejalashtirayotgani to‘g‘risida xabar berilgandi.
Izoh (0)