Ислом тараққиёт банкининг (ITБ) Ўзбекистондаги мониторинг миссияси делегация раҳбари Вахю Вижаянто Қорақалпоғистон Вазирлар Кенгаши раиси Фарҳод Эрманов ҳамда Иқтисодиёт ва молия вазирлигининг лойиҳани амалга ошириш гуруҳи вакиллари билан учрашди. Бу ҳақда БМТ Тараққиёт дастури матбуот хизмати хабар берди.
Қайд этилишича, учрашув давомида томонлар Қорақалпоғистоннинг мақсадли ҳудудларида “Қишлоқ жойларни барқарор ривожлантириш” лойиҳасининг бориши ва ташаббусларни амалга оширишдаги муаммоларни муҳокама қилган. Ундан кўзланган асосий мақсад маҳаллий аҳолининг фаол иштироки орқали қишлоқ ҳудудларини ривожлантиришдан иборат.
Қорақалпоғистонда, Бухоро, Навоий ва Хоразмдаги мазкур лойиҳани амалга ошириш учун ITБ жами 200 миллион доллар ажратган.️ Бугунги кунга қадар лойиҳа 113 та қишлоқни ривожлантириш режаларини ишлаб чиққан.
Улардан 31 таси Қорақалпоғистоннинг 5 та туманидаги 160 та ижтимоий инфратузилма объектларини яхшилашга қаратилган.
“Лойиҳанинг кутилаётган таъсири қашшоқликни инклюзив қисқартириш ва барқарор ўсиш орқали иқтисодий ривожланишни рағбатлантириш бўйича миллий ривожланиш мақсадига эришишга ҳисса қўшишдан иборат. Лойиҳа самараси қишлоқ аҳолиси фаровонлигини ошириш, иқтисодий даромад олиш имкониятларини яратишдир”, — дейилади лойиҳа тавсифида.
Лойиҳа мақсади:
- Маҳаллий ҳамжамиятларнинг ўз манфаатларини аниқлаш, қизиқиш ва эҳтиёжларни намойиш этиш салоҳиятини кучайтириш;
- Маҳаллий архитектура, лойиҳа институтлари ва ҳудудий қурилиш бошқармалари вакилларини тайёрлаш;
- Гендер жиҳатларини ҳисобга олган ҳолда инновацион IT-ечимлар ва рақамли трансформацияни амалга ошириш учун қурилиш сектори ва архитектура дизайни салоҳиятини ривожлантириш;
- Барқарор инфратузилмани таъминлаш учун қарорлар қабул қилиш жараёнларига маҳаллий ҳамжамиятларни жалб қилиш.
Аввалроқ Ислом тараққиёт банкининг Ўзбекистонда мактаблар қуриш ва таъмирлашга маблағ ажратишни режалаштираётгани тўғрисида хабар берилганди.
Изоҳ (0)