Farg‘ona viloyatining eng so‘lim go‘shasi Shohimardonda sharqona yangi yil — Navro‘z bayrami munosabati bilan xalq sayillari o‘tkazildi. Navro‘z tantanalarida ishtirok etgan “Daryo” muxbirlari bayram sayillarining eng qiziq jihatlarini tasvirga olib, fotoreportaj tayyorladi.
Markazdagi Istirohat bog‘i erta tongdanoq gavjum bo‘ldi. Bayram ishtirokchilari karnay-surnay sadolari ostida kutib olindi.
Udumga ko‘ra, dastlab “Hazrat Ali Shohimardon” ziyoratgohida yurtga tinchlik, elga omonlik, dehqonchilik yumushlari va hosilga qut-baraka tilab, ezgu duolar qilindi.
Farg‘ona viloyati hokimi Xayrullo Bozorov ishtirokida “Yashil makon” umummilliy loyihasi doirasida ziyoratgoh hududiga mevali va manzarali daraxt ko‘chatlari ekildi.
Xalq sayillari sportchi yoshlarning ko‘rgazmali chiqishlari, dor va milliy o‘yin musobaqalari bilan boshlandi. Kurash, tosh ko‘tarish, arqon tortish, varraklar sayli, xalq amaliy sanʼati — folklor namunalari, bir-biridan mazali milliy taomlar tanlovlari o‘tkazildi.
Xiyobon bo‘ylab o‘rnatilgan doshqozonlarda Navro‘zning shoh taomi — sumalak qaynadi, osh damlanib, bayram ishtirokchilariga tarqatildi.
Folklor guruhlari, xalq ansambllari, badiiy havaskorlik jamoalari tomonidan xalqona kuy-qo‘shiqlar, o‘lan-laparlar ijro etildi.
Sayli davomida shohimardonliklar chuqurlashtirilgan tibbiy ko‘rikdan o‘tkazildi. “Temir daftar” va “Ayollar daftari” ro‘yxatida turgan 20 nafar xotin-qizga tikuv mashinalari taqdim etildi. Xorazm viloyatiga sayohat qilishlari uchun 30 nafar xotin-qizlarga bepul yo‘llanmalar berildi. Ehtiyojmand oila farzandlarining davolanish harajatlari, oliy taʼlim muassasalarida tahsil olayotgan talabalarning shartnoma pullarini to‘lab berish hamda imtiyozli kreditlar uchun sertifikatlar taqdim etildi. Hudud yoshlari bo‘sh vaqtlarini mazmunli o‘tkazishlari uchun maktablarga musiqa cholg‘u asboblari, sport jihozlari, kitoblar to‘plami topshirildi.
Izoh (0)