Фарғона вилоятининг энг сўлим гўшаси Шоҳимардонда шарқона янги йил — Наврўз байрами муносабати билан халқ сайиллари ўтказилди. Наврўз тантаналарида иштирок этган “Дарё” мухбирлари байрам сайилларининг энг қизиқ жиҳатларини тасвирга олиб, фоторепортаж тайёрлади.
Марказдаги Истироҳат боғи эрта тонгданоқ гавжум бўлди. Байрам иштирокчилари карнай-сурнай садолари остида кутиб олинди.
Удумга кўра, дастлаб “Ҳазрат Али Шоҳимардон” зиёратгоҳида юртга тинчлик, элга омонлик, деҳқончилик юмушлари ва ҳосилга қут-барака тилаб, эзгу дуолар қилинди.
Фарғона вилояти ҳокими Хайрулло Бозоров иштирокида “Яшил макон” умуммиллий лойиҳаси доирасида зиёратгоҳ ҳудудига мевали ва манзарали дарахт кўчатлари экилди.
Халқ сайиллари спортчи ёшларнинг кўргазмали чиқишлари, дор ва миллий ўйин мусобақалари билан бошланди. Кураш, тош кўтариш, арқон тортиш, варраклар сайли, халқ амалий санъати — фолклор намуналари, бир-биридан мазали миллий таомлар танловлари ўтказилди.
Хиёбон бўйлаб ўрнатилган дошқозонларда Наврўзнинг шоҳ таоми — сумалак қайнади, ош дамланиб, байрам иштирокчиларига тарқатилди.
Фолклор гуруҳлари, халқ ансамбллари, бадиий ҳаваскорлик жамоалари томонидан халқона куй-қўшиқлар, ўлан-лапарлар ижро этилди.
Сайли давомида шоҳимардонликлар чуқурлаштирилган тиббий кўрикдан ўтказилди. “Темир дафтар” ва “Аёллар дафтари” рўйхатида турган 20 нафар хотин-қизга тикув машиналари тақдим этилди. Хоразм вилоятига саёҳат қилишлари учун 30 нафар хотин-қизларга бепул йўлланмалар берилди. Эҳтиёжманд оила фарзандларининг даволаниш ҳаражатлари, олий таълим муассасаларида таҳсил олаётган талабаларнинг шартнома пулларини тўлаб бериш ҳамда имтиёзли кредитлар учун сертификатлар тақдим этилди. Ҳудуд ёшлари бўш вақтларини мазмунли ўтказишлари учун мактабларга мусиқа чолғу асбоблари, спорт жиҳозлари, китоблар тўплами топширилди.
Изоҳ (0)