Венгрия Украинага Европа аскарларининг юборилиши сценарийсидан огоҳлантирди

Украинада кескинлик хавфи доимий ортиб бормоқда, Ғарб давлатлари можарони маҳаллий қолишини эмас, балки уни умумийлаштиришга қарор қилган. Бу ҳақда Венгрия мудофаа вазири Криштоф Салай-Бобровницки Индех нашрига берган интервьюсида маълум қилди.

У уруш бошида Ғарб етакчиларининг тарихда яхшилик ва ёмонлик томонлари бор улардан бирини танлаш керак, деганини эслатди. Энди, дея давом этди вазир, Ғарб давлатлари Россияга қарши санкциялар учун овоз бериш, молиявий ёрдам кўрсатиш ва мудофаа харажатларини оширишни бошлаган. Ҳозир Украинага Леопард танклари келяпти, “қирувчилар ҳам йўлда”.

“Агар аҳвол шундай давом этса, Украинанинг инсон ресурслари тугаганда  яна аскарлар керак бўлади. Бу ҳам ўзига хос эскалация ва оқибатда Европа уруш эпитцентрида пайдо бўлади”, — деди Салай-Бобровницки.

Журналист унга Венгрия ҳам украиналик ҳарбий шифокорларни тайёрлаётганини эслатиб, бу ҳам ҳарбий ёрдамми, деб сўради. Вазир бунга жавобан Венгрия ҳеч қандай қурол етказиб бермаётганини таъкидлади ва шундай тушунтирди: “Бир томондан, Украина ҳужумга учраган давлат бўлса, бошқа томондан у бизнинг қўшнимиз. Бу бизнинг муаммога дуч келганларга ёрдам бериш учун яхши қўшничилик ва маънавий бурчимиз. Будапешт бошиданоқ буни ўз тарихидаги энг йирик гуманитар операциянинг бир қисми сифатида амалга оширмоқда”.

Март ойи ўрталарида Венгрия бош вазири Виктор Орбан Европа қўшинларини Украинага юбориш эҳтимоли ҳақида гапирган эди. “Менимча, Украина билан иттифоқчи давлат аскарларини чегарадан ўтказиб, Украина ҳудудига юбориш бўйича жиддий таклифга жуда яқин турибмиз”, — деди у. Венгрия ҳукумати раҳбарининг фикрича, дунё “маҳаллий урушнинг жаҳон урушига айланишига ҳеч қачон бунчалик яқин бўлмаган”.

Унинг бу тахминларини Италия ташқи ишлар вазири Антонио Тажани рад этди. “Биз ҳеч қачон Киевга қўшин юбориш ҳақида гаплашмаганмиз. Куни кеча G7 вакилларининг АҚШ Давлат котиби Энтони Блинкен иштирокида йиғилиши бўлиб ўтди, унда қўшинларни юбориш масаласи муҳокама қилинмади”, — дея тушунтирди у.

АҚШ, Германия ва бошқа Ғарб давлатлари расмийлари Украинага қўшин юбориш имкониятини бир неча бор рад этиб, бу Россия билан тўғридан тўғри ҳарбий тўқнашувга олиб келишини таъкидлаган.