Ukraina prokuraturasi Ukrainadagi harbiy jinoyatlarda gumon qilingan 600 nafar rossiyalik qo‘mondonga, jumladan, Rossiya prezidenti Vladimir Putinga oid yuzlab ma’lumotlarni to‘pladi. Bu haqda The Guardian xabar berdi.
Prokurorlar The Guardian nashriga o‘zlari tuzgan, uzunligi 4 metr va eni 1,5 metr bo‘lgan jadval-sxemasini ko‘rsatdi. Unda Ukrainada jinoiy ish qo‘zg‘atilgan gumonlanuvchilarning ism-shariflari va fotosuratlari mavjud. Rossiya mudofaa vaziri Sergey Shoygu va Putindan tortib harbiy unvonli mulozimlargacha jadvaldan joy olgan.
“Biz 2022-yili rus qo‘mondonlari va generallari haqida ma’lumot to‘plashni boshladik. Bu ma’lumotlarni har hafta yangilab boramiz”, — dedi Xarkov viloyati bosh prokurori Aleksandr Filchakov.
Gumonlanuvchilar orasida Mariupolning uch oylik qamaliga rahbarlik qilgan general-polkovnik Mixail Mizintsev ham bor. Mariupolda Ukraina rasmiylari 22 ming kishi halok bo‘lganini ma’lum qilgan. Shaharning vayron bo‘lishi “Rossiya bombardimonlari natijasida vayronaga aylangan Suriyadagi Halab qamaliga” qiyoslangan.
Mizintsev Suriyadagi reydlarni boshqargan va harbiy ekspertlarning fikriga ko‘ra, u Mariupolda bu tajribadan qisman foydalangan. 2022-yil mart oyida Britaniya hukumati Mizintsevga qarshi shaxsiy sanksiyalar kiritgan.
Ukraina prokuraturasi qo‘lida 64-alohida motoo‘qotar brigada komandiri Azatbek Omurbekov (1983-yil Nukusda tug‘ilgan) haqidagi ma’lumot ham bor. Uning brigadasi Buchada faoliyat olib borgan va uning askarlari tinch aholini o‘ldirish, zo‘rlash va qiynoqqa solishda ayblanmoqda.
Ukraina prokuraturasi harbiy jinoyatlarga oid 67 ming holat bo‘yicha tergov olib borayotgani haqida xabar bergandi. Ukraina tashqi ishlar vaziri Dmitriy Kuleba 14-mart kuni yana ikki davlat Ukrainaga qarshi jinoyatlar bo‘yicha maxsus tribunal yaratish koalitsiyasiga qo‘shilganini aytdi. Ammo bu qaysi davlatlar ekanini ochiqlamadi.
“Hozir 32 davlat Rossiyaning oliy siyosiy va harbiy rahbariyatini javobgarlikka tortish uchun birgalikda ishlamoqda. Putin va uning sheriklari sudga tortiladi”, — deb yozdi Kuleba Twitter’dagi sahifasida.
Izoh (0)