Ukraina prezidenti Vladimir Zelenskiy Donetsk viloyatining Kramatorsk shahriga Rossiya harbiylarining 14-mart kuni bergan zarbalari oqibatini namoyish qildi.
Ma’lum qilinishicha, Rossiya raketasi Kramatorsk shahar markaziga kelib tushgan. Oltita ko‘p qavatli uy vayron bo‘lgan. Kamida uch kishi jarohatlangan, bir kishi halok bo‘lgan. Zelenskiy oilalarga hamdardlik bildirgan va qutqaruv ishlari davom etayotganini aytgan.
“Yovuz davlat tinch aholi bilan kurashishni davom ettirmoqda. Begunoh odamlarni hayotdan mahrum qilgan har bir zarba qonuniy va adolatli jazoga olib kelishi kerak. Albatta, shunday bo‘ladi”, — deb yozgan Zelenskiy video ostida.
Ukraina prezidenti avvalroq Baxmut mudofaasini davom ettirish borasida gapirib, bu orqali Rossiya harbiylarining Kramatorskka, Slyavyanskka oldinga siljishining oldini olish mumkinligini aytgandi. Donetsk viloyati Baxmut yaqinidagi vaziyat juda og‘ir, Rossiya bor kuchlarini u yerga to‘plagan. Chasov Yardan tashqariga chiqish ruslarga Drujkovka, Kramatorsk va Slavyansk tomon yo‘l ochishi ta’kidlangan.
Izoh (0)