Rossiya prezidenti Vladimir Putin Ukrainadagi urush va boshqa mavzular bo‘yicha yangi bayonot berdi. Bu haqda “TASS” xabar berdi.
Putin Ulan-Ude aviatsiya zavodi xodimlari bilan bo‘lgan suhbatda bu bo‘yicha gapirdi. U Rossiya o‘z davlatchiligining mavjudligi uchun kurashayotganini va bu omon qolish vazifasi ekanini ta’kidladi. Rossiya prezidentining asosiy bayonotlari quyidagilardan iborat:
- Hozirgi xalqaro muammolar SSSR parchalanganidan keyin boshlandi;
- G‘arbning geosiyosiy manfaatlari ular uchun hatto SSSR bilan mafkuraviy qarama-qarshiliklardan ham muhimroq bo‘lib chiqdi;
- SSSR parchalanganidan keyin G‘arb Rossiyani tebratishga harakat qildi, beshinchi kolonnani yaratdi, xalqaro terrorchilar qo‘shinlarini yubordi;
- Rossiya o‘nlab yillar davomida sabr-toqat bilan Ukraina bilan munosabatlarni tiklashga urindi, biroq 2014-yilgi davlat to‘ntarishidan keyin vaziyat o‘zgardi;
- Rossiya Ukraina bilan munosabatlarida o‘zini katta rus dunyosining bir qismi deb hisoblaganlarga tayangan. Ammo 2014-yildan boshlab ularni yo‘q qilish boshlandi;
- Rossiya 8 yil davomida Donbass muammosini tinch yo‘l bilan hal qilishga urinib ko‘rdi, lekin uni aldashdi, “burnidan sudrashdi”;
Shuningdek, Putin Rossiya ko‘p millatli davlat ekani, lekin Ukrainadagi rus dunyosi uchun kurashishi, u yerdagi odamlarni tashlab keta olmasligini aytdi. Rossiya dunyoni yaqinlashtirish, muvaffaqiyat va g‘alabaga erishish uchun birdamlikni namoyon qilishi kerakligini bildirdi. U Rossiyaga qarshi qo‘llanilgan sanksiyalar haqida ham to‘xtalib, G‘arb sanksiyalardan keyin Moskva ikki-uch hafta yoki bir oy ichida qulab tushishini kutganini aytdi.
“Sanksiyalarning uzoq muddatli oqibatlari xavfi bor, ammo hammasi yaxshi bo‘lishi kutilmoqda. Rossiya iqtisodiy suverenitetining bir necha barobar o‘sishi 2022-yilning eng muhim natijasidir. Mamlakatning moliyaviy tizimi nafaqat saqlanib qoldi, balki mustahkamlandi, barqaror rivojlanmoqda”, — degan u.
Rossiya rahbari mahalliy biznes ketayotgan G‘arb kompaniyalari o‘rnini “osonlik bilan” egallaganini aytib, Xitoyga yangi gaz quvurining yotqizilishi Rossiyaning qo‘shni hududlarini ham gazlashtirish imkonini berishini qayd etdi.
Izoh (0)