Foto: Iordaniya qirolichasi Raniyaning to‘ng‘ich qizi malika Imonning hashamatli kelinlik obrazlari

Malika Imon to‘yi kuni Venetsiya kutyuridan nafis kelinlik libosi, gullar bilan bezatilgan fata va buvisining tiarasini kiydi.

Qirol Abdulla II va qirolicha Raniyaning katta qizi Jamil Termiotisga turmushga chiqdi. Iordaniya qirollik oilasi a’zolari ishtirok etgan marosim Omman chekkasidagi Bayt al-Urdun saroyida bo‘lib o‘tdi. 26 yoshli kelinni mehrobga katta akasi, valiahd shahzoda Husayn olib bordi, u ham tez orada kuyov bo‘lishi kerak. Marosimda boshqa qirollik qarindoshlari bilan birga bo‘lajak qirolning qallig‘i Rajva as-Saif ham ishtirok etdi.

Marosimda nikoh shartlari belgilab olindi, kelin va kuyov uch guvoh: kelinning otasi qirol Abdulla II va uning ikki ukasi, valiahd shahzoda Husayn va shahzoda Hoshim ishtirokida nikoh shartnomasini imzoladi. Keyin ular yaqinlarining tabriklarini qabul qilib, to‘y tortini kesishdan oldin bir-birlariga uzuk taqishdi.

26 yoshli malika Imon tik yoqali Dior ko‘ylagi va nafis gulli kashta tikilgan fata kiydi. Moda sharhlovchilari darhol baland bo‘yinli model fransuz brendining 2022-yil kuzgi kutyurelar kolleksiyasidan olingan deb hisoblashdi.

Malika nikoh to‘yida buvisi — qirol Abdulla II ning onasi malika Muna al-Husaynga tegishli bo‘lgan olmos bilan bezatilgan tiara kiygan. Oilaviy bezak fransuz zargarlik uyi Chaumet tomonidan tayyorlangan.

Malika Imonning kuyovi Jamil esa kulrang jiletli kostyum kiygan. 28 yoshli yigit Venesuelada grek oilasida tug‘ilgan. U biznes boshqaruvi bakalavri darajasiga ega va Nyu-York shahrida moliya sohasida ishlaydi, Nyu-Yorkda joylashgan Outbound Ventures venchur kapitali firmasi bilan hamkorlik qiladi.

Qirolicha Raniya to‘ng‘ich qizining to‘yi uchun yenglari qirrali och binafsharang burmali ko‘ylak tanlagan. Iordaniya qiroli va qirolichasining kenja qizi, 22 yoshli malika Salma esa Endryu Gn modalar uyidan onasi yaxshi ko‘radigan to'q pushti ko‘ylak kiygan. To‘yga valiahd shahzoda Husaynning qallig‘i Rajva as-Saif yorqin sariq rangdagi Roksanda Ilincic libosida kelgan.

Boshqa to‘y marosimlariga kelsak, o‘tgan seshanba kuni malika Imon va uning oila a’zolari, do‘stlari uchun an’anaviy xina kechasi o‘tkazilgan. Malika iordan-falastinlik dizayner Rima Dabhurning atlas etakli va keng belbog‘li naqshli oq ipak libosida paydo bo‘ldi, bu onasining to‘y libosi dizayniga ishora qiladi. Qirolicha Raniya o‘sha oqshom an'anaviy to‘q pushti rangdagi libos tanlab, suratlarini ijtimoiy tarmoqlarga joylashtirdi. Uning bo‘lajak kelini ham xuddi shu rangdagi libos kiydi.

Bundan tashqari, to‘ydan bir necha soat oldin qirolicha Raniya to‘y marosimi detallari — gullar, shamlar, yostiqlar va xushbo‘y tutatqilar bilan bezalgan bazmxona videosini ijtimoiy tarmoqlarda baham ko‘rgan. U chiroyli dekor uchun Iordaniyaning ADegree kompaniyasiga minnatdorlik bildirgan.