Фото: Иордания қироличаси Раниянинг тўнғич қизи малика Имоннинг ҳашаматли келинлик образлари

Малика Имон тўйи куни Венеция кутюридан нафис келинлик либоси, гуллар билан безатилган фата ва бувисининг тиарасини кийди.

Қирол Абдулла II ва қиролича Раниянинг катта қизи Жамил Термиотисга турмушга чиқди. Иордания қироллик оиласи аъзолари иштирок этган маросим Омман чеккасидаги Байт ал-Урдун саройида бўлиб ўтди. 26 ёшли келинни меҳробга катта акаси, валиаҳд шаҳзода Ҳусайн олиб борди, у ҳам тез орада куёв бўлиши керак. Маросимда бошқа қироллик қариндошлари билан бирга бўлажак қиролнинг қаллиғи Ражва ас-Саиф ҳам иштирок этди.

Маросимда никоҳ шартлари белгилаб олинди, келин ва куёв уч гувоҳ: келиннинг отаси қирол Абдулла II ва унинг икки укаси, валиаҳд шаҳзода Ҳусайн ва шаҳзода Ҳошим иштирокида никоҳ шартномасини имзолади. Кейин улар яқинларининг табрикларини қабул қилиб, тўй тортини кесишдан олдин бир-бирларига узук тақишди.

26 ёшли малика Имон тик ёқали Dior кўйлаги ва нафис гулли кашта тикилган фата кийди. Мода шарҳловчилари дарҳол баланд бўйинли модел француз брендининг 2022 йил кузги кутюрелар коллекциясидан олинган деб ҳисоблашди.

Малика никоҳ тўйида бувиси — қирол Абдулла II нинг онаси малика Муна ал-Ҳусайнга тегишли бўлган олмос билан безатилган тиара кийган. Оилавий безак француз заргарлик уйи Chaumet томонидан тайёрланган.

Малика Имоннинг куёви Жамил эса кулранг жилетли костюм кийган. 28 ёшли йигит Венесуэлада грек оиласида туғилган. У бизнес бошқаруви бакалаври даражасига эга ва Нью-Йорк шаҳрида молия соҳасида ишлайди, Нью-Йоркда жойлашган Outbound Ventures венчур капитали фирмаси билан ҳамкорлик қилади.

Қиролича Рания тўнғич қизининг тўйи учун енглари қиррали оч бинафшаранг бурмали кўйлак танлаган. Иордания қироли ва қироличасининг кенжа қизи, 22 ёшли малика Салма эса Эндрю Гн модалар уйидан онаси яхши кўрадиган тўқ пушти кўйлак кийган. Тўйга валиаҳд шаҳзода Ҳусайннинг қаллиғи Ражва ас-Саиф ёрқин сариқ рангдаги Роксанда Илинcиc либосида келган.

Бошқа тўй маросимларига келсак, ўтган сешанба куни малика Имон ва унинг оила аъзолари, дўстлари учун анъанавий хина кечаси ўтказилган. Малика иордан-фаластинлик дизайнер Рима Дабҳурнинг атлас этакли ва кенг белбоғли нақшли оқ ипак либосида пайдо бўлди, бу онасининг тўй либоси дизайнига ишора қилади. Қиролича Рания ўша оқшом анъанавий тўқ пушти рангдаги либос танлаб, суратларини ижтимоий тармоқларга жойлаштирди. Унинг бўлажак келини ҳам худди шу рангдаги либос кийди.

Бундан ташқари, тўйдан бир неча соат олдин қиролича Рания тўй маросими деталлари — гуллар, шамлар, ёстиқлар ва хушбўй тутатқилар билан безалган базмхона видеосини ижтимоий тармоқларда баҳам кўрган. У чиройли декор учун Иорданиянинг АDegree компаниясига миннатдорлик билдирган.