Zamonaviy pop musiqa malikasi, aktrisa, xayriyachi, muvaffaqiyatli ishbilarmon ayol va nihoyat, ajoyib ona — bularning barchasi Rianna haqida. Yaqinda u birinchi farzandini dunyoga keltirgandi, hozir esa ikkinchi farzandiga homilador.
2023-yil 12-fevralda Rianna 5 yil ichida birinchi marta sahnaga chiqdi. U Super Bowl’ning tanaffus paytida chiqish qildi, u yerda o‘zining eng xit qo‘shiqlarini ijro etdi. Tomoshabinlar darhol uning yumaloq qorniga e’tibor qaratdilar. Ulardan ba’zilari xonanda birinchi farzandi tug‘ilgandan keyin qomatini shu tarzda g‘urur bilan namoyish etyapti, deb o‘ylagan, boshqalari esa uning homiladorligini taxmin qilgan.
Shoudan bir soat o‘tib xonandaning vakillari barcha muxlislarga xushxabarni yetkazishdi. Muxlislarning bir qismi xafa bo‘ldi, chunki bu Riannaning uzoq kutilgan 9-albomi noma’lum muddatga qoldirilayotganini anglatadi, boshqalari esa xonanda uchun chin dildan xursand bo‘ldi.
Sahnaga chiqishidan bir necha kun oldin Rianna ikkinchi farzandiga homilador ekaniga ishora qilgan, ammo ko‘pchilik buni shoudan keyin anglab yetdi. Muxbirning shou davomida tomoshabinlarni kutilmagan hodisalar kutyaptimi, degan savoliga u shunday javob bergandi: “Men kimnidir olib kelish haqida o‘ylayapman. Ishonchim komil emas, lekin ko‘ramiz”. Tabiiyki, muxlislar xonanda o‘z vaqtida hamkorlik qilgan ko‘plab san’atkorlardan biri haqida gapiryapti deb o‘ylashgan, ammo ular yanglishdi.
Rianna Super Bowl’da chiqish qilish yoki qilmasligi haqida ko‘p o‘ylab o‘tirmaganini aytadi: “Ona bo‘lganingizda o‘zingizni hamma narsani qila oladigandek his qilasiz. Superkubok esa men uchun shunday holatlardan biri edi. O‘g‘lim uchun ham bu chiqishimni ko‘rish juda muhim edi”. 2022-yil may oyida Rianna sevgilisi, repper A$AP Roky’dan birinchi farzandini dunyoga keltirdi. Ammo u hali ham bolaning ismini oshkor qilmagan bo‘lsa-da, yaqinda uni videosini ko‘rsatdi, hatto u bilan birga Vogue fotosessiyasida ishtirok etdi.
Rianna intervyularidan birida chaqaloq tabassumi u uchun ota-onalikdagi eng yaxshi narsa ekanligini aytadi: “Farzandim tabassum qilganda, hamma narsa ikkinchi darajaga tushadi. Bu dunyodagi eng yaxshi narsa!”. Otasi A$AP Roky’ning so‘zlariga ko‘ra, u har safar Rianna va o‘g‘lining oldiga kelganida xuddi jannatga tushib qolganga o‘xshaydi.
Rianna homiladorlik paytida va undan keyingi garderobi haqida shunday deydi: “Homiladorligimda kiyinishim juda oddiy edi, ammo keyin hammasi o‘zgardi. Tug‘uruqxonadan uyga qaytganimdan keyin bir hafta davomida faqat tolstovka va sport shimlarini kiyib yurdim. Ammo bir necha hafta o‘tgach, nima kiyishni bilmay qoldim, chunki hamma narsa juda kichik yoki juda katta edi”.
Mashhur er-xotinning yaqinlari Rianna ona bo‘lishni chindan ham yaxshi ko‘rishini va u o‘g‘li bilan ovora ekanligini ta’kidlaydi. Xonanda butun vaqtini bola bilan o‘tkazishga harakat qiladi. Uning sevgilisi ham ajoyib ota. Er-xotin do‘stlarining so‘zlariga ko‘ra, Rianna hech qachon ona bo‘lishni orzu qilmagan, ammo Rokki bilan tanishishi uni tom ma’noda bunga olib kelgan.
Rianna, shuningdek, onalik hissi o‘zining onasiga bo‘lgan muhabbatning butunlay yangi darajasini ochganini aytadi. Xonanda onasini ko‘proq qadrlay va hurmat qila boshladi. Postlarning birida u onasining fotosuratini joylashtirib, shunday deb yozdi: “Bugun malikamning tug‘ilgan kuni! Onalik cho‘qqisida men onamga bo‘lgan muhabbat va hurmatning yangi darajalarini kashf qildim, buni hech qachon tushuntirib bera olmayman! Men unga har soniyada gul berishni xohlayman! Men sizni yaxshi ko‘raman, oyi!”
Sevgilisi bilan munosabatlari o‘zgargan-o‘zgarmaganligi haqida fikr yuritar ekan, Rianna shunday deydi: “Bola tug‘ilishidan oldin ham biz bir-birimizni juda yaxshi tushunganmiz. Men bir narsani ayta olaman: ota-onalik bizni yanada yaqinroq qildi. U o‘g‘lining otasi bilan bo‘lgan munosabatiga qoyil qolishdan to‘xtamaydi: “Ular birga bo‘lganlarida shunchaki chetda turib, ularning erkaklar klubiga kirish uchun navbatimni sabr bilan kutaman. O‘g‘lim otasini juda yaxshi ko‘radi. Men esa hayron bo‘laman: nima bo‘lyapti, seni men tug‘madimmi?”
Xuddi shu intervyuda jurnalist Riannaga 2020-yilda qo‘shiqchi uch yoki hatto to‘rtta farzand ko‘rishni xohlayotganini aytganini eslatdi. Xonanda bunga javoban: “Yo‘g‘-ey, rostdan ham shunday deganmanmi? Jin ursin, tilimga ehtiyot bo‘lishim kerak. Aslida men hammaga ochiqman. Chindan ham men ko‘proq farzand ko‘rishni xohlayman”.
Birinchi farzandi tug‘ilganidan bir necha hafta o‘tgach, taniqli juftlikning yaqinlaridan biri ular ikkinchi farzandli bo‘lishni xohlashayotganini aytdi: “Ular katta oilani orzu qiladi. Rianna homilador bo‘lishni yaxshi ko‘radi, u o‘z qomatini boricha qabul qildi”. Shuningdek, u tez orada yana farzand ko‘rishsa, hayron bo‘lmasligini ham qo‘shimcha qilgan. Bu esa yaqin kelajakda sodir bo‘ladi.
Izoh (0)