Тошкентда наркокурьерларни “самосуд” қилган гуруҳ аъзоларига ҳукм ўқилди

Тошкент шаҳри Шайхонтоҳур туманида наркокурьерларни “самосуд” қилиб келган гуруҳ ушлангани тўғрисида хабар берилганди. UzReport телеканалида узатилган лавҳада маълум қилинишича, қонунбузарлар жавобгарликка тортилган.

Эслатиб ўтамиз, 2022 йил октябрь ойида ижтимоий тармоқларда номаълум шахслар фуқарони ураётгани акс этган видео тарқалганди. Аниқланишича, номаълум шахслар Telegram-bot орқали гиёҳванд моддаларни тарқатиш билан шуғулланган йигитларни Бўстонлиқ туманига олиб бориб калтаклаб тан жароҳати етказиб, устига “зелёнка” моддасини сепган.

2023 йил февраль ўрталарида Шайхонтоҳур туманида наркокурерларни “самосуд” қилиб келган гуруҳ ушланганди. Ўшанда гуруҳ раҳбарлари ўғрилик қилган ёки бошлиғини ҳақоратлаган ишчиларнинг “ақлини киритиб қўйиш” учун муштумзўр йигитларни ёллагани маълум бўлганди. Ҳар бир калтакланган “закладчик” учун 300—500 долларгача ваъда қилинган. Пуллар иш бажарилиб, видеофакт кўрилгач, ижрочиларнинг картасига ташлаб берилган.

10 март куни Жиноят ишлари бўйича Миробод туман судида мазкур жиноят иши бўйича суд мажлиси бўлиб ўтиб, айбланувчиларга нисбатан суд ҳукми ўқилди.

Суд ҳукмига кўра, 2001 йилда туғилган (Ш.А.) судланувчи “Одам ўғирлаш” ва “Қасддан баданга ўртача оғир шикаст етказиш” жиноятларини содир этганликда айбли деб топилган ва унга нисбатан 6 йил муддатга озодликдан маҳрум қилиш жазоси тайинланган.

Шунингдек, 2001 йилда туғилган судланувчи (А.Р.) “Одам ўғирлаш” ва “Қасддан баданга ўртача оғир шикаст етказиш” жиноятларини содир этганликда айбли деб топилган ва 5 йил 6 ой муддатга озодликдан маҳрум қилиш жазоси тайинланган.

Сурия давлати фуқароси бўлган судланувчи эса “Жиноят ҳақида хабар бермаслик ёки уни яшириш” жиноятини содир этганликда айбли деб топилган ва базавий ҳисоблаш миқдорининг 20 баравари миқдорида (6 миллион сўм) жарима жазоси тайинланган. Ҳибсдаги 3 куннинг ҳар бир куни базавий ҳисоблаш миқдорининг икки бир қисмига тенглаштириб, тайинланган жазодан чегириб, унга базавий ҳисоблаш миқдорининг 18,5 баравари, 5,55 миллион сўм миқдорида жарима жазоси қолдирилган. Жарима давлат фойдасига ундирилиши белгиланган.