Соғлиқни сақлаш вазири Амрилло Иноятов раҳбарлигида 11 март куни вазирликнинг навбатдан ташқари ҳайъат йиғилиши бўлиб ўтди. Бу ҳақда вазирлик ахборот хизмати хабар берди.
Мажлисда қайд этилишича, соҳада бюрократик тўсиқлар ҳали ҳам учрамоқда. Аҳолини сифатли дори-дармон воситалари, тиббий буюм ва жиҳозлар билан таъминлаш, тизимда ижро интизомини назорат қилиш борасида қатор муаммолар мавжуд.
Шунингдек, соғлиқни сақлаш йўналишида халқаро инвестисиялар жалб қилинишини мувофиқлаштириш, болалар тиббиётида илғор даволаш усулларини амалиётга татбиқ этиш бўйича ишлар ҳам етарли даражада ташкил қилинмаётгани маълум қилинди.
Йиғилишда берилган топшириқ ва вазифалар ҳамда қўйилган талабларни ўз вақтида бажармагани сабабли “Ўзмедимпекс” МЧЖ директори А.Набиев, Болалар миллий тиббиёт маркази директори вазифасини вақтинча бажарувчи Алишер Шарипов эгаллаб турган лавозимидан озод қилинди.
Шунингдек, ўз йўналишида етарли натижа кўрсата олмагани боис вазирликнинг Дори воситалари ва тиббий буюмлар ва жиҳозлар муомаласини тартибга солиш ва мурувват ёрдамини мувофиқлаштириш бошқармаси бошлиғи Х.Ғаниева ҳамда яна бир қатор масъуллар ҳам ишдан олингани маълум қилинди.
Йиғилишда вазир Амрилло Иноятов тиббиёт тизимидаги ҳар бир раҳбар ўз вазифасига виждонан ёндашиши кераклигини таъкидлаб, бугунги кун талабидан келиб чиққан ҳолда соҳа олдида турган долзарб масалаларга тўхталиб ўтган.
Изоҳ (0)