“Euronews.travel” нашри Ўзбекистоннинг халқаро сайёҳлар учун тобора очилиб бораётгани тўғрисида мақола эълон қилди. “Дарё” мақоланинг таржимасини тақдим этади.
Бир пайтлар сайёҳлар учун ёпиқ бўлган Ўзбекистон ҳозирда халқаро саёҳатчиларни фаол қабул қилмоқда. Хитой, Яқин Шарқ ва Европа ўртасидаги қадимий савдо йўли бўлган Ипак йўлининг марказида жойлашган, денгизга чиқа олмаган мамлакат сайёҳларга қадимий ва замонавий даврларнинг ўзига хос уйғунлигини, шунингдек, кўплаб эко ва агротуризм имкониятларини таклиф этади.
“Ўзбекистоннинг сайёҳлик йўналиши сифатида юксалиши раҳбарият алмашганидан бошланди. Бизнинг янги президентимиз мамлакатни либераллаштирди, бу виза режими либераллаштирилганда, айниқса, туризм соҳасида яққол намоён бўлди”, — дейди маданият ва туризм вазирининг биринчи ўринбосари Улуғбек Аъзамов.
Ўзбекистонга бориш учун виза керакми?
Эндиликда 93 давлат, жумладан, Европа Иттифоқига аъзо барча давлатлар ва Буюк Британия фуқаролари Ўзбекистонга визасиз, 50 дан ортиқ давлат эса электрон визалар билан ташриф буюриши мумкин. Саёҳат қоидаларининг бундай енгиллашуви сўнгги йилларда туризмнинг ўсишини кўрсатди, 2019 йилда ташриф буюрувчилар сони 6,7 миллионга етди. Пандемия жаҳон миқёсида туризмни орқага қайтарди, аммо бу йил Ўзбекистон пандемиядан олдинги рақамлардан ошиб кетишига умид қилмоқда, бу билан тахминан 7 миллион халқаро сайёҳ кутилмоқда.
Хоҳ замонавий пойтахт Тошкентнинг театр ва музейларига , хоҳ исломий Бухоро шаҳрининг қадимий масжид ва минораларига ташриф буюришни хоҳлайсизми — мамлакат ўзига хос тарихга эга бўлиб, яқин вақтгача кўплаб сайёҳлар учун бунинг имкони йўқ эди.
“Бизда ҳамиша шундай салоҳият бор эди. UNESCO бутунжаҳон мероси объектлари: Самарқанд, Бухоро, Шаҳрисабз шаҳарлари мавжуд, аммо шу пайтгача ўз имкониятларимизни ишга солмадик, энди бундан фойдаланяпмиз”, – дейди Улуғбек Аъзамов.
Самарқанд ҳақида нималарни билиш керак?
Яқин Шарқ ва Шарқий Осиё ўртасида жойлашгани сабабли “Маданиятлар чорраҳаси” сифатида танилган Самарқанд шаҳри ўзбек саргузаштларини бошлаш учун энг зўр манзил. Бу Марказий Осиёдаги энг қадимий доимий аҳоли яшайдиган шаҳарлардан бири бўлиб, унинг илдизлари милоддан аввалги 6-асрга бориб тақалади. Ислом дунёсидаги энг эътироф этилган мажмуалардан бири ҳисобланган Registon ансамбли жойлашган шаҳар Ўзбекистонга кириш эшиги ҳисобланади.
Ўзбекистоннинг қоғоз ишлаб чиқариш анъаналари
Ўзбекистон Хитой аскарлари босқинидан қоғоз ясаш сирларини ўргангач, 8-асрдан бери ўз қоғозчилик соҳасини ривожлантириб келмоқда.
Ҳикоя Самарқанд ҳукмдори босқинчи Хитой қўшинларини мағлубиятга учратганидан бошланади. Бу пайтда кўплаб хитойлик аскарлар асирга олингани айтилади. Асирлар ўзини қутқариш учун қоғоз ишлаб чиқариш сирларини ўргатган ва шундан сўнг Самарқанд бу қадимий ҳунармандчилик марказига айланган.
Самарқандда қоғоз ишлаб чиқариш анъанаси кўп асрлар давомида йўқотилди, фақатгина 20-асрга келиб бу қайта тикланди ва энди сиз шаҳардаги Мерос қоғоз фабрикасига ташриф буюришингиз мумкин.
Бухоро: Ислом дунёсининг қадимий шаҳрига саёҳат қилинг
Ўзбекистоннинг энг қадимий шаҳарларидан бири бўлган Бухоро 2500 йилдан ортиқ тарихга эга бўлиб, мамлакатдаги ислом маданиятининг маркази ҳисобланади. Масжидлар, мадрасалар ва Минораи Калон минг йилдан ортиқ тарихга эга.
Маҳаллий диққатга сазовор жойлар орасида дунёдаги энг қадимий ҳаммомлардан бири бўлган Ҳаммам Бозори Корд узоқ кунлик сайрдан кейин дам олиш учун ажойиб жой ҳисобланади.
Угом-Чотқол миллий боғи: табиат қўйнида қор қоплонлари ва қизил тулкиларни томоша қилинг
Ўзбекистонда сайёҳлик ва рейслар сони ортиб бораётган бир пайтда, мамлакат ўзининг экотуризм салоҳиятини ҳам ривожлантирмоқчи. Мамлакатнинг узоқ шимоли-шарқида жойлашган Угом-Чотқол миллий боғи сайёҳлар ташриф буюриши шарт бўлган манзил ҳисобланади, у ерда ноёб флора ва фауна ҳамда сутемизувчилар, жумладан, қор қоплонлари ва қизил тулкилар яшайди.
Чотқол тоғи атрофидаги ҳудуд UNESCO биосфера резервати ҳисобланади ва бу ерда милоддан аввалги 1000—2000 йилларга оид қадимий чизмаларни ҳам топишингиз мумкин.
Гастротуризм: Ўзбекистон миллий ошхонаси кўплаб мазали таомларга эга
Ҳудуд маданиятини билмоқчи бўлсангиз, албатта, таомларини татиб кўринг. Ўзбекистонда бу кўмирда пиширилган гўшт, тандир кабоб, палов ва қуритилган мевалар, ёнғоқларнинг кенг танловини англатади.
Анъанавий ўзбек патирларини ҳам татиб кўринг, масалан, лойдан ясалган тандирда пиширилган юмалоқ ноннинг таъми сизда ўзгача таассурот қолдиради.
Минтақада вино ишлаб чиқариш узоқ йиллардан бери мавжуд бўлиб, Самарқанд ва Тошкент атрофида сайёҳлар ташриф буюриши мумкин бўлган бир қатор вино заводлари мавжуд.
Изоҳ (0)