Kattaqo‘rg‘on shahar hokimligi tomonidan o‘tkazilgan 200 million so‘mlik davlat xaridida bir qator qonunbuzilish holatlari aniqlangani sababli bekor qilindi. Bu haqda Korrupsiyaga qarshi kurashish agentligi axborot xizmati xabar berdi.
Xabarga ko‘ra, Korrupsiyaga qarshi kurashish agentligi tomonidan olib borilgan monitoring natijasida Kattaqo‘rg‘on shahar hokimligi buyurtmachiligida ayollar daftarida turgan fuqarolarga tikuv mashinalari xarid qilish yuzasidan 2023-yil 13-fevral kuni o‘tkazilgan 200 million so‘mlik davlat xaridida bir qator qonunbuzilish holatlari aniqlandi.
Xususan, monitoring natijalari davlat xaridida ishtirok etgan 3 ta talabgorlardan 2 tasi bir shaxsga tegishli ekani, yaʼni o‘zaro affillangani holatlari mavjudligini ko‘rsatdi. Shuningdek, ushbu xaridda ishtirok etgan 3 ta tadbirkorning hujjatlari ham maxsus elektron platformaga buyurtmachiga tegishli kompyuterdan foydalanilgan holda yuklangani maʼlum bo‘ldi.
Mazkur holatlar bo‘yicha xarid komissiyasining bayonnomasini bekor qilish to‘g‘risida buyurtmachiga taqdimnoma kiritildi va chora ko‘rish uchun to‘plangan hujjatlar Bosh prokuraturaga yuborildi, holat yuzasidan xizmat tekshiruvi o‘tkazish uchun Samarqand viloyat hokimligiga so‘rovnoma kiritildi.
Maʼlum qilinishicha, viloyat hokimligi tomonidan 2023-yil 27-fevral kuni agentlikka taqdim etilgan xatga ko‘ra, agentlikning taqdimnomasida qayd etilgan kamchiliklar bartaraf etilib, xarid komissiyasining bayonnomasi bekor qilingan hamda o‘z xizmat vazifalarini lozim darajada bajarmagan xarid komissiyasining raisiga nisabatan maʼmuriy, bir nafar komissiya aʼzosiga esa intizomiy javobgarlik qo‘llanilgan.
Avvalroq Asaka tuman tibbiyot birlashmasi o’tkazgan 620 mln so’mlik tender bekor qilingani haqida xabar berilgandi. Mazkur davlat xaridida ham bir qator qonunbuzilish holatlari aniqlangan.
Shuningdek, Yangiobod chorva kompleksi o‘tkazgan 634 million so‘mlik 9 ta tender ishtirokchilari o‘zaro affillangan ekani aniqlangani xabar qilingan.
Izoh (0)