Каттақўрғон шаҳар ҳокимлиги томонидан ўтказилган 200 миллион сўмлик давлат харидида бир қатор қонунбузилиш ҳолатлари аниқлангани сабабли бекор қилинди. Бу ҳақда Коррупцияга қарши курашиш агентлиги ахборот хизмати хабар берди.
Хабарга кўра, Коррупцияга қарши курашиш агентлиги томонидан олиб борилган мониторинг натижасида Каттақўрғон шаҳар ҳокимлиги буюртмачилигида аёллар дафтарида турган фуқароларга тикув машиналари харид қилиш юзасидан 2023 йил 13 февраль куни ўтказилган 200 миллион сўмлик давлат харидида бир қатор қонунбузилиш ҳолатлари аниқланди.
Хусусан, мониторинг натижалари давлат харидида иштирок этган 3 та талабгорлардан 2 таси бир шахсга тегишли экани, яъни ўзаро аффиллангани ҳолатлари мавжудлигини кўрсатди. Шунингдек, ушбу харидда иштирок этган 3 та тадбиркорнинг ҳужжатлари ҳам махсус электрон платформага буюртмачига тегишли компьютердан фойдаланилган ҳолда юклангани маълум бўлди.
Мазкур ҳолатлар бўйича харид комиссиясининг баённомасини бекор қилиш тўғрисида буюртмачига тақдимнома киритилди ва чора кўриш учун тўпланган ҳужжатлар Бош прокуратурага юборилди, ҳолат юзасидан хизмат текшируви ўтказиш учун Самарқанд вилоят ҳокимлигига сўровнома киритилди.
Маълум қилинишича, вилоят ҳокимлиги томонидан 2023 йил 27 февраль куни агентликка тақдим этилган хатга кўра, агентликнинг тақдимномасида қайд этилган камчиликлар бартараф этилиб, харид комиссиясининг баённомаси бекор қилинган ҳамда ўз хизмат вазифаларини лозим даражада бажармаган харид комиссиясининг раисига нисабатан маъмурий, бир нафар комиссия аъзосига эса интизомий жавобгарлик қўлланилган.
Аввалроқ Асака туман тиббиёт бирлашмаси ўтказган 620 млн сўмлик тендер бекор қилингани ҳақида хабар берилганди. Мазкур давлат харидида ҳам бир қатор қонунбузилиш ҳолатлари аниқланган.
Шунингдек, Янгиобод чорва комплекси ўтказган 634 миллион сўмлик 9 та тендер иштирокчилари ўзаро аффилланган экани аниқлангани хабар қилинган.
Изоҳ (0)