Туркиянинг Ҳатай вилояти Искендерун шаҳрида вайронкор зилзилалардан жабр кўрган аҳоли учун ўзбекистонлик ошпазлар ҳар куни палов пиширмоқда. Бу ҳақда Anadolu хабар берди.
50 кишидан иборат ўзбекистонлик кўнгиллилар табиий офат оқибатларини бартараф этиш мақсадида зилзилаларнинг иккинчи кунидаёқ Ҳатай вилоятига етиб келган. Ташриф Истанбулдаги Ўзбекистон маданият, тадқиқот ва бирдамлик уюшмаси томонидан ташкил этилган. Кўнгиллилар муҳтожларга инсонпарварлик ёрдамларини тарқатиш билан бирга, дала ошхонасида овқат тайёрламоқда.
Ўзбекистонлик ошпазлар ҳар куни эрталаб 16 минг кишига таом тайёрлайди, жумладан, зилзиладан жабр кўрган Искендерун, Қирихон ва Антакя ҳудудларига ўзбек палови етказиб берилади. Гуруҳ координатори Азизбей Мухаммедиевнинг Anadolu нашрига берган интервьюсида айтишича, ўзбекистонлик кўнгиллилар 6 февралдаги зилзилалар ҳақида билиши биланоқ фалокат ҳудудига етиб борган. Қидирув-қутқарув ишларида 20 нафар кўнгилли иштирок этган.
“Улар озиқ-овқат ва инсонпарварлик ёрдами билан таъминлашда ҳам иштирок этди”, — дейди Мухаммедиев.
Гуруҳ координатори қидирув-қутқарув гуруҳлари иш ниҳоясига етгач, ҳудудни тарк этгани, ошпазлар эса ўз вазифаларини бажаришда давом этганини айтди.
“Дастлаб 1 500 кишига ош тарқатишни режалаштирган эдик, бироқ иссиқ овқатга эҳтиёж борлигини кўриб, уни оширдик. Одатда биз ўзбек паловини пиширамиз, уни пишириш учун 50 кг гўшт керак бўлади. Уни тайёрлашда Ўзбекистондан келтирилган сабзи, басмати гуручидан фойдаланамиз. Ҳозир 5 ошпаз ва 15 ёрдамчимиз бор. 10 киши иссиқ овқат тарқатмоқда”, — деди координатор.
Туркиянинг жануби-шарқида 6 февраль куни 7 магнитудадан юқори иккита зилзила содир бўлди. Табиий офат қурбонлари сони 46,1 минг кишидан ошди. Ер силкиниши Сурия, Ливан, Шимолий Кипр Турк Республикаси, Греция Кипри ва Ироқда ҳам сезилди.
Изоҳ (0)