“Бавария” сўнгги 6 ўйиннинг 5 тасида “ПСЖ”дан устун келди, парижликлар йил бошидан буён 6-мағлубиятини қабул қилди. Мюнхенда ўтган ўйиндаги рақамлар ва фактлар

Футбол бўйича Европа Чемпионлар Лигасининг нимчорак финал жавоб ўйинида “Бавария” ва “ПСЖ” 8 март, чоршанба куни ўзаро баҳс олиб борди.

Учрашувда мюнхенликлар 2:0 ҳисобида зафар қучди. 61-дақиқада Эрик Максим Шупо-Мотинг гол урган бўлса, 89-дақиқада Серж Гнабри якуний ҳисобни ўрнатди.

Шу тариқа “Бавария” парижликлар билан сўнгги 6 ўйиннинг 5 тасида ғалаба қозонди. 2017 йил 5 декабридан буён Мюнхен клуби 5 та ўйинда ғолиб бўлди ва фақатгина 2021 йил 7 апрель кунидаги ўйинда 2:3 ҳисобида мағлубиятга учраган. 

“ПСЖ” эса 2023 йилдаги 6-мағлубиятини қабул қилиб олди. Кристоф Гальтье шогирдлари жорий йил 15 та ўйинда иштирок этиб, шундан олтитасида (“Ланс”га қарши 1:3, “Ренн”га қарши 0:1, “Монако”га қарши 1:3, “Марсель”га қарши 1:2, “Бавария”га қарши ўйинда 0:1 ва 0:2) мағлуб бўлди. 2023 йил бошига қадар эса жамоа бирор маротаба имкониятни бой бермаганди. 

“ПСЖ” ҳужумчиси Лионель Месси Чемпионлар Лигасида асосий таркибда майдонга тушиш бўйича 3-ўринга кўтарилиб олди. Аргентиналик “Бавария”га қарши баҳсда ўз фаолиятида 150 марта асосий таркибда майдонга тушди. Фақатгина Икер Касиляс (176 марта) ва Криштиану Роналдулар (178) ундан олдинда. 

Лео кетма-кет учинчи марта ЕЧЛ нимчорак финалида ўз иштирокини якунламоқда (2 йил “ПСЖ” билан, бир йил “Барселона” сафида) ва кетма-кет 8 йил турнир финалига чиқа олмаяпти. Месси сўнгги бор 2015 йилда “Барселона” билан бирга “шалпангқулоқ”ни қўлга киритганди. Ўшанда каталонияликлар “Ювентус”ни 3:1 ҳисобида мағлуб этган.