Sirdaryo viloyatida yashovchi onaxon Zulayho Ismoilova nafaqa pulini Turkiyadagi zilziladan jabrlanganlarga yordam tariqasida yuborgani haqida xabar berilgandi. Zulayho ayaning nabirasi Asqar Ismoilovning “Daryo”ga maʼlum qilishicha, onaxon “Turkiya qutqaruvchisi” nomiga munosib ko‘rilgan.
Bu haqda shoir Muhammad Ismoil ham o‘zining shaxsiy Telegram kanalida shunday yozadi:
“Bugun men uchun quvonchli kun. 99 yoshli Zulayho hoji onam Ismoilovaga ‘Turkiya qutqaruvchisi’ degan faxriy yorliq va Turkiya qutqaruvchilari kiyadigan jilet taqdim etishdi. Ko‘ksim tog‘day ko‘tarildi. Aslida, hamma onalar qahramon. Onalar beshik tebratadi, onalar hech qachon tobut ko‘tarmaydi. Dunyoning yarmi onalar bo‘lsa, qolgan yarmini onalar dunyoga keltiradi. Onam Turkiyadagi zilzilani, devor ostida qolgan odamlarni ko‘rib, ko‘ziga yosh oldi. Turkiya dardini o‘z dardiday qabul qildi. Onam Sardobadagi talafotda birinchilardan bo‘lib yordamga shoshgandi. Endi esa, Turkiyaga borish niyatida. Iloho, hammamizning qahramon onalarimiz sog‘ bo‘lsin. Shunday onalarimiz bor ekan, o‘zbek millati dunyodagi eng buyuk millat bo‘laveradi”, — deydi shoir bu haqda.
To‘qqiz nafar farzandning onasi, nevara, chevara hamda evaralarining sevimli buvisi bo‘lgan Zulayho aya Ismoilova birinchi darajali mehnat faxriysi bo‘lgani uchun davlatdan 4,5 million so‘m miqdorida nafaqa oladi.
“Turkiya xalqi boshiga og‘ir ish tushibdi. Ularga judayam ichim achidi. Shunga nafaqamdan orttirgan pullarimni Turkiyadagi zilziladan jabrlanganlarga yuboryapman. Sal bo‘lsa-da, yordamim tegsa, xursand bo‘lardim. Alloh ularning mushkulini oson qilsin”, — degandi zilziladan jabrlanganlarga 20 million so‘m miqdoridagi mablag‘ xayriya qilgan onaxon.
Izoh (0)