Tog‘li Qorabog‘da Ozarbayjon va Armaniston xavfsizlik kuchlari o‘rtasida otishma yuz berdi, har ikki tomondan qurbonlar va jarohatlanganlar bor. Bu haqda Ozarbayjon Mudofaa vazirligi xabar berdi.
Ozarbayjon Mudofaa vazirligiga ko‘ra, arman tomoni Xankendi-Xalfali-Tursu avtomobil yo‘li bo‘ylab Rossiya tinchlikparvar kontingenti joylashgan Ozarbayjonga harbiy texnika, o‘q-dorilar va askarlarni o‘tkazishga uringan. Ozarbayjon chegarachilari hujjatlarni tekshirish uchun ularni to‘xtatgan, shundan so‘ng otishma boshlangan. Ikki tomondan otishma natijasida qurbonlar va yaradorlar bor. Ozarbayjon Mudofaa vazirligi yo‘qotishlar haqida keyinroq ma’lumot berishini ma’lum qildi.
“5-mart kuni Ozarbayjon armiyasi bo‘linmalari noqonuniy harbiy yuk tashishni amalga oshirayotgan transport vositalarini to‘xtatishga uringan. Ayni paytda Armaniston tomondan o‘q uzilishi natijasida Ozarbayjon qurolli kuchlarining harbiy xizmatchilari halok bo‘lgan va yaralanganlar bor. Ozarbayjon kuchlari otishmaga javoban o‘q uzgan”, — deyiladi Mudofaa vazirligi bayonotida.
Ozarbayjon tomoni Rossiya tinchlikparvar kontingenti qo‘mondonligini uch tomonlama deklaratsiya bandlarining so‘zsiz va to‘liq bajarilishini ta’minlashga chaqirdi. Mudofaa vazirligi Qorabog‘ iqtisodiy rayoni va Armaniston o‘rtasida foydalanish mumkin bo‘lgan yagona yo‘l Xonkendi-Lochin ekanini ta’kidladi. Vazirlik boshqa yo‘nalishlarda harbiy va boshqa yuk tashishlarni amalga oshirishga yo‘l qo‘yib bermasligini ma’lum qildi.
Vazirlikning qo‘shimcha qilishicha, Armanistondan Qorabog‘ iqtisodiy rayoniga qurol-yarog‘, o‘q-dorilar, boshqa harbiy texnika, jumladan, minalar, yoqilg‘i va ishchi kuchi olib o‘tish faktlari avvalroq aniqlangan. Ozarbayjon tomoni xalqaro hamjamiyatni ko‘rsatilgan yo‘nalish bo‘ylab minalar tashish haqida bir necha bor ogohlantirgan.
“Bugungi voqea yana bir bor Ozarbayjonning Lochin-Xonkendi yo‘lida tegishli nazorat-o‘tkazish punkti tashkil etishi zarurligini ko‘rsatmoqda. Armanistonning Ozarbayjonning Qorabog‘ iqtisodiy rayoniga harbiy yuk tashish ishlarini davom ettirayotgani mamlakatning Ozarbayjonga nisbatan ishg‘olchilik siyosatidan voz kechmaganini, Armanistonning tinchlik dasturi haqidagi qarashlari ikkiyuzlamachilikdan boshqa narsa emasligini ko‘rsatadi. Provokatsiya uchun barcha javobgarlik Armaniston harbiy-siyosiy rahbariyatiga yuklatilgan”, — deyiladi xabarda.
Sputnik Armanistonning xabar berishicha, otishmada uch arman politsiyasi halok bo‘lgan, yana bir huquq-tartibot xodimi esa kasalxonaga yotqizilgan. Armaniston Mudofaa vazirligi holat yuzasidan bayonot bermagan.
Izoh (0)