Тоғли Қорабоғда Озарбайжон ва Арманистон хавфсизлик кучлари ўртасида отишма юз берди, ҳар икки томондан қурбонлар ва жароҳатланганлар бор. Бу ҳақда Озарбайжон Мудофаа вазирлиги хабар берди.
Озарбайжон Мудофаа вазирлигига кўра, арман томони Ханкенди-Халфали-Турсу автомобиль йўли бўйлаб Россия тинчликпарвар контингенти жойлашган Озарбайжонга ҳарбий техника, ўқ-дорилар ва аскарларни ўтказишга уринган. Озарбайжон чегарачилари ҳужжатларни текшириш учун уларни тўхтатган, шундан сўнг отишма бошланган. Икки томондан отишма натижасида қурбонлар ва ярадорлар бор. Озарбайжон Мудофаа вазирлиги йўқотишлар ҳақида кейинроқ маълумот беришини маълум қилди.
“5 март куни Озарбайжон армияси бўлинмалари ноқонуний ҳарбий юк ташишни амалга ошираётган транспорт воситаларини тўхтатишга уринган. Айни пайтда Арманистон томондан ўқ узилиши натижасида Озарбайжон қуролли кучларининг ҳарбий хизматчилари ҳалок бўлган ва яраланганлар бор. Озарбайжон кучлари отишмага жавобан ўқ узган”, — дейилади Мудофаа вазирлиги баёнотида.
Озарбайжон томони Россия тинчликпарвар контингенти қўмондонлигини уч томонлама декларация бандларининг сўзсиз ва тўлиқ бажарилишини таъминлашга чақирди. Мудофаа вазирлиги Қорабоғ иқтисодий раёни ва Арманистон ўртасида фойдаланиш мумкин бўлган ягона йўл Хонкенди-Лочин эканини таъкидлади. Вазирлик бошқа йўналишларда ҳарбий ва бошқа юк ташишларни амалга оширишга йўл қўйиб бермаслигини маълум қилди.
Вазирликнинг қўшимча қилишича, Арманистондан Қорабоғ иқтисодий раёнига қурол-яроғ, ўқ-дорилар, бошқа ҳарбий техника, жумладан, миналар, ёқилғи ва ишчи кучи олиб ўтиш фактлари аввалроқ аниқланган. Озарбайжон томони халқаро ҳамжамиятни кўрсатилган йўналиш бўйлаб миналар ташиш ҳақида бир неча бор огоҳлантирган.
“Бугунги воқеа яна бир бор Озарбайжоннинг Лочин-Хонкенди йўлида тегишли назорат-ўтказиш пункти ташкил этиши зарурлигини кўрсатмоқда. Арманистоннинг Озарбайжоннинг Қорабоғ иқтисодий раёнига ҳарбий юк ташиш ишларини давом эттираётгани мамлакатнинг Озарбайжонга нисбатан ишғолчилик сиёсатидан воз кечмаганини, Арманистоннинг тинчлик дастури ҳақидаги қарашлари иккиюзламачиликдан бошқа нарса эмаслигини кўрсатади. Провокация учун барча жавобгарлик Арманистон ҳарбий-сиёсий раҳбариятига юклатилган”, — дейилади хабарда.
Sputnik Арманистоннинг хабар беришича, отишмада уч арман полицияси ҳалок бўлган, яна бир ҳуқуқ-тартибот ходими эса касалхонага ётқизилган. Арманистон Мудофаа вазирлиги ҳолат юзасидан баёнот бермаган.
Изоҳ (0)