Антарктида атрофидаги муз майдони 1979 йилдан бери минимал даражага қисқариб, 1,79 миллион квадрат километрни ташкил этмоқда. Муз рекорд даражада эримоқда ва глобал иқлим ўзгаришига таҳдид солмоқда. Бу ҳақда The Guardian хабар берди.
25 февралга келиб, икки ҳафта ичида 136 минг квадрат километр муз эриб кетган, бу Тасмания оролининг майдонидан икки баробар кўпдир. Тасмания университетининг Антарктика денгиз музи бўйича мутахассиси Уилл Хоббснинг таъкидлашича, Антарктида музларининг эришига қуёш нури сабабчи эмас.
“Денгиз музи акс эттирувчи бўлгани учун уни қуёш нурларидан эриши қийин", — дейди Хоббс.
У ва бошқа олимларнинг таъкидлашича, янги рекорд олти йил ичида учинчи марта янгиланган. Муз майдонининг рекорд даражада қисқариши жаҳон океани даражасининг жиддий кўтарилиши ва глобал иқлим ўзгариши билан таҳдид солмоқда. Илмий ҳамжамият кўраётган асосий таҳдидлардан бири бу Амундсен денгизидаги Туэйц музлиги ёки “Қиёмат музлиги”дир. У эриганида, океан ярим метрга кўтарилиши мумкин.
“Антарктида бизга узоқда бўлиб туюлиши мумкин, аммо у ердаги ўзгаришлар глобал иқлимга таъсир қилади ва муз қатламларининг эриши бутун дунё бўйлаб қирғоқ жамоаларига таъсир қилади. Ҳамма Антарктидада содир бўлаётган воқеалардан хавотирланиши керак”, — дейди Монаш университети иқлимшуноси Ариан Перич.
Изоҳ (0)