Markaziy Osiyodagi eng yirik tabiiy gaz ishlab chiqaruvchi Turkmaniston iqtisodiyoti 2023-yilning yanvar—fevral oylarida 6,2 foizga o‘sdi, bu o‘tgan yilgi ko‘rsatkichlarga mos keladi. Bu haqda “Daryo”ning Turkmanistondagi muxbiri xabar berdi.
Mustaqil davlat jadal rivojlanishda davom etmoqda, — dedi mamlakat prezidenti Serdar Berdimuhamedov hukumat yig‘ilishida.
Hisobot davrida tabiiy gaz ishlab chiqarish o‘tgan yilga nisbatan 1,6 foizga, elektr energiyasi ishlab chiqarish 6,3 foizga, tashqi savdo aylanmasi 3,4 foizga o‘sdi.
Turkmaniston O‘zbekistondan tashqari o‘z gazini Xitoy, Rossiya va Ozarbayjonga (Eron orqali), elektr energiyasini esa Afg‘oniston, Eron va Qirg‘izistonga (O‘zbekiston orqali) yetkazib beradi. Ashxobod, shuningdek, jahon bozorlariga neft mahsulotlari, to‘qimachilik, mineral o‘g‘itlar, oziq-ovqat yetkazib beradi.
Yevropa tiklanish va taraqqiyot banki (YTTB) 2023-yilda Turkmanistonning iqtisodiy o‘sish sur’atini 6,5 foiz, Osiyo taraqqiyot banki (OTB) — 5,8 foiz, Xalqaro valyuta jamg‘armasi (XVJ) — 2,3 foiz darajasida prognoz qilgan.
Izoh (0)