Toshkent metrosida iPhone orqali onlayn to‘lov qilish imkoniyati yaratildi

Metropoliten yo‘lovchilari uchun yangi to‘lov tizimi joriy etildi. Bu haqda O‘zbekiston Milliy axborot agentligi xabar bermoqda.

Endilikda yo‘lovchilar “ATTO” mobil ilovasidagi NFC kategoriyasi orqali to‘lovlarni amalga oshirishi mumkin bo‘ladi. Bunda ilovaning operatsion tizimi va u bilan to‘lash mumkin bo‘lgan qurilma orqali plastik kartalarsiz onlayn to‘lov amalga oshiriladi.

Ma’lumotlarga ko‘ra, qurilma Toshkent metropolitenining “Buyuk ipak yo‘li” bekatida o‘rnatilgan bo‘lib, undan iOS operatsion tizimida ishlovchi telefonlar orqali foydalanish mumkin.

Qurilmani “Chilonzor”, so‘ng bosqichma-bosqich barcha metro bekatlarida joriy qilish rejalashtirilgan.

Oldin faqat Android qurilmalari orqali NFC to‘lovni amalga oshirish mumkin edi. Endi iOS tizimi orqali to‘lash imkoniyati mavjud. Bunda ikki va undan ko‘p marotaba to‘lovni amalga oshirish mumkin, — deydi “ATTO” texnik mutaxassisi Azizbek Karimov.

Ushbu qurilmalar NFC modul deb nomlanmoqda. iOS tizimidan farqli ravishda Android qurilmalari orqali NFC to‘lov odatiy yashil validatorlar orqali amalga oshiriladi.