Qirg‘iziston O‘zbekistonga eksport uchun sut va go‘sht mahsulotlarini yetkazib beradi. Bu haqda Qirg‘iziston Qishloq xo‘jaligi vazirining birinchi o‘rinbosari Nurdin Alisherovga tayanib, “Economist.kg” xabar bermoqda.
Alisherovning so‘zlariga ko‘ra, departament O‘zbekiston hukumati bilan “yo‘l xaritasi”ni allaqachon imzolagan va hozir Qirg‘iziston Respublikasidan sut va go‘sht mahsulotlarini eksport qilish uchun chegaralarni ochish bo‘yicha muzokaralar olib borilmoqda.
“Hozir Qishloq xo‘jaligi vazirligi fermerlarga zotli chorva mollarini ko‘paytirishga yo‘naltirmoqda. Kuniga besh litr sut beradigan to‘rtta sigir boqishdan ko‘ra, qirq litr sut beradigan bitta zotli sigir boqilgani ma’qul”, — dedi vazir o‘rinbosari.
Alisherov chorvachilik yo‘nalishi Qirg‘iziston uchun ayniqsa istiqbolli ekanini, doimiy o‘sish sur’atlari kuzatilayotganini ta’kidladi.
O‘zbekiston Qirg‘iziston uchun 35 million aholiga ega yangi va muhim bozor hisoblanadi.
Dekabr oyi oxirida O‘zbekiston Mo‘g‘ulistondan go‘sht importini oshirishi ma'lum bo‘lgandi.
Izoh (0)