Украинада Россия босқини бошланганидан бери АҚШ Мудофаа вазирлиги 4000 дан ортиқ украиналик ҳарбийларни жангга тайёрлади. Бу ҳақда АҚШ штаб бошлиқлари қўмитасининг операциялар бўлими бошлиғи генерал-лейтенант Дуглас Симсга таяниб, CNN хабар бермоқда.
“Январь ойидан бери АҚШ ҳарбийлари яна 1000 нафар украиналикни тайёргарликдан ўтказди, Қўшма Штатлар томонидан ўқитилган Украина қўшинларининг умумий сони 4000 нафардан сал кўпроққа етди”, — деди генерал Конгрессдаги тингловда.
Хусусан, Оклахома штатидаги Форт-Силлда Патриот ҳаво мудофаа тизими билан ишловчи гуруҳ тайёрланмоқда. Симснинг сўзларига кўра, тайёргарлик тез орада якунланади.
АҚШдаги Украина мудофаа атташеси Борис Кременецкий Patriot’дан фойдаланишни ўрганиш учун бошқа ҳаво ҳужумига қарши мудофаа тизимларидан фойдаланиш тажрибасига эга ҳарбий хизматчилар юборилганини таъкидлади. Бунинг ёрдамида уларга асосларни ўргатиш шарт бўлмаган ва тайёргарлик вақти бир неча ойдан бир неча ҳафтагача қисқарган.
Украина ҳарбийлари Буюк Британия, Германия, Дания ва Польша каби бошқа Ғарб давлатларида ҳам ўқитилмоқда. Германия мудофаа вазири Борис Писториуснинг айтишича, Россия ҳарбий амалиёти бошланганидан бери немис ҳарбийлари Украина Қуролли кучларининг 1200 га яқин ҳарбий хизматчисини тайёрлаган. Унинг сўзларига кўра, йил охиригача уларнинг сони 3 мингдан ошади, жумладан, украиналиклар Marder пиёда жанговар машинаси ва Леопард 2 танкини бошқаришни ўрганмоқда.
Украинанинг Буюк Британиядаги элчиси Вадим Пристайконинг таъкидлашича, Буюк Британиядаги украиналик учувчилар Ғарб жанговар самолётларида машқ қилишни бошлаган. Шу билан бирга, ҳозирча ҳеч бир давлат Киевга қирувчилар етказиб беришини эълон қилмаган.
Изоҳ (0)