Toshkent shahrida 28-fevraldan boshlab bir qator avtobus yo‘nalishlari oraliq harakatlari o‘zgartiriladi, deya xabar beradi “Toshshahartransxizmat” matbuot xizmati.
Qayd etilishicha, bu yo‘nalishlar tarmog‘ini maqbullashtirish, yo‘lovchilarga ko‘rsatilayotgan transport xizmatlari sifatini oshirish maqsadida amalga oshirilmoqda. Xususan:
32-sonli (“4-avtobus saroyi” filialiga biriktirilgan) Sergeli 6-a mavzesi—Gulobod ko‘chasi avtobus yo‘nalishining oraliq harakati Furqat—Alisher Navoiy ko‘chalari kesishmasida tashkil etilgan yangi chorraha orqali;
56-sonli (“7-avtobus saroyi”) Chorsu savdo markazi—“Tariqteshar” mahallasi yo‘nalishining oraliq harakati Islom Karimov—Furqat ko‘chalari kesishmasida tashkil etilgan yangi chorraha orqali;
84-sonli (“4-avtobus saroyi”) Obod turmush—Gulobod ko‘chasi yo‘nalishining oraliq harakati Novza—Bunyodkor va Furqat—Alisher Navoiy ko‘chalari kesishmalarida tashkil etilgan yangi chorrahalar orqali;
112-sonli (“12-avtobus saroyi”) Olchazor mahallasi—Food city savdo majmuasi avtobus yo‘nalishining oraliq harakati Qipchoq ko‘chasidan Tursunzoda, Shokirariq ko‘chalari orqali etib belgilandi.
Avvalroq so‘nggi bekatlari Food city savdo majmuasi ASHBda joylashtirilgan 39, 45, 110, 122, 130-sonli yo‘nalishlarning oraliq harakati 4Р21 va Bektemir yo‘li ko‘chalari kesishmasida tashkil etilgan yangi chorraha orqali (2023-yil 10-fevral kunidan boshlab) o‘zgartirilgandi.
Shu bilan birga, 101-sonli “Darxon” mahallasi—Buyuk ipak yo‘li metrosi yo‘nalishining ish kunlaridagi ish boshlash vaqti soat 05:30 dan etib belgilandi.
Eslatib o‘tamiz, poytaxtda 2022-yil 9-avgustdan boshlab uchta yangi avtobus yo‘nalishi yo‘lga qo‘yilgandi. Shuningdek, Toshkentda 16-avgustdan boshlab to‘rtta yangi avtobus yo‘nalishi, Bektemirda metro yo‘nalishi bo‘ylab vaqtinchalik avtobus yo‘nalishi tashkil etilgandi.
Izoh (0)