Turkiya chempionatidan o‘rin olgan o‘yinda muxlislar maydonga yumshoq o‘yinchoqlarni uloqtirdi. O‘yinchoqlar zilzila oqibatida aziyat chekkan bolalarga yetkaziladi

Turkiya chempionatidan o‘rin olgan “Beshiktosh” va “Antalyaspor” o‘rtasida kechgan bahsda (0:0) muxlislar maydonga yumshoq o‘yinchoqlarni uloqtirdi.

Tribunadan maydonga tashlangan o‘yinchoqlar zilzila oqibatida aziyat chekkan bolalarga yuboriladi. 

Yumshoq o‘yinchoqlar o‘yin boshlanishidan avval o‘rindiqlarga qo‘yib chiqilgan edi. 

O‘yin avvalida o‘yinchoqlar shu tariqa maydonga tashlandi. 

“Bolalar doimo tabassum qilsin” — aksiya davomida muxlislar shunday hayqirishdi. 

“Beshiktosh” aksiya haqida videoni tarmoqlarga e’lon qildi. 

Stadion tablosida esa mamlakat hududida zilziladan so‘ng halok bo‘lgan bolalar soni ko‘rsatildi.
Turkiya bo‘ylab jami qurbonlar soni 44,3 ming nafardan oshgan. UNICEF vakili Jeyms Elderning aytishicha, Turkiya va Suriyadagi tabiiy ofatdan kamida 7,1 million bola jabr ko‘rgan. 

Bu hammasi emas — “Beshiktosh” futbolchisi boshqa bir foydali aksiyaga qo‘l urdi

“Beshiktosh”ning ayollar jamoasi a’zosi, meksikalik Sofiya Alvares zilzila qurbonlariga yordam berish kampaniyasini boshladi: Futbol2Sismo0 2017-yilda o‘tkazilgan Futbol1Sismo0 loyihasining davomi bo‘ldi. O‘sha yili Sofiya Meksika bo‘ylab qator zilzila qurbonlariga yordam qo‘lini cho‘zgandi. 

Tashabbusning mazmuni — butun dunyo bo‘ylab futbolchilar imzosi tushirilgan liboslarni kimoshdi savdosiga qo‘yish orqali kerakli mablag‘ni to‘plashdan iborat. O‘tgan safar Serxio Ramos, Krishtianu Ronaldu, Fernando Torres, David Vilya, Andres Guardado va Rafael Markeslarning imzosi tushirilgan liboslar kimoshdi savdosida sotilgan edi. Bu safar Sofiya barcha meksikalik futbolchilardan yordam so‘ramoqda.

“2017-yilda men Meksikadagi zilzila oqibatida jabrlanganlarga yordam berish maqsadida Futbol1Sismo0 loyihasini amalga oshirgandim. Imzolar tushirilgan liboslarni sotish orqali 200 ming peso oldim va ushbu pullarni barcha narsalaridan ayrilgan 5 ta oilaga davlat fondi orqali yo‘naltirdim. Turkiyada ham shu ishni takrorlamoqchimiz. Allaqachon “Beshiktosh” futbolchilaridan birining libosini kimoshdi savdosida sotganman va jabrlanganlarga vaqtinchalik boshpana beradigan tashkilot bilan bog‘langanman”, — deydi Alvares.