Туркия чемпионатидан ўрин олган “Бешиктош” ва “Анталяспор” ўртасида кечган баҳсда (0:0) мухлислар майдонга юмшоқ ўйинчоқларни улоқтирди.
Трибунадан майдонга ташланган ўйинчоқлар зилзила оқибатида азият чеккан болаларга юборилади.
Юмшоқ ўйинчоқлар ўйин бошланишидан аввал ўриндиқларга қўйиб чиқилган эди.
Ўйин аввалида ўйинчоқлар шу тариқа майдонга ташланди.
“Болалар доимо табассум қилсин” — акция давомида мухлислар шундай ҳайқиришди.
“Бешиктош” акция ҳақида видеони тармоқларга эълон қилди.
Стадион таблосида эса мамлакат ҳудудида зилзиладан сўнг ҳалок бўлган болалар сони кўрсатилди.
Туркия бўйлаб жами қурбонлар сони 44,3 минг нафардан ошган. UNICEF вакили Жеймс Элдернинг айтишича, Туркия ва Суриядаги табиий офатдан камида 7,1 миллион бола жабр кўрган.
Бу ҳаммаси эмас — “Бешиктош” футболчиси бошқа бир фойдали акцияга қўл урди
“Бешиктош”нинг аёллар жамоаси аъзоси, мексикалик София Альварес зилзила қурбонларига ёрдам бериш кампаниясини бошлади: Futbol2Sismo0 2017 йилда ўтказилган Futbol1Sismo0 лойиҳасининг давоми бўлди. Ўша йили София Мексика бўйлаб қатор зилзила қурбонларига ёрдам қўлини чўзганди.
Ташаббуснинг мазмуни — бутун дунё бўйлаб футболчилар имзоси туширилган либосларни кимошди савдосига қўйиш орқали керакли маблағни тўплашдан иборат. Ўтган сафар Серхио Рамос, Криштиану Роналду, Фернандо Торрес, Давид Вилья, Андрес Гуардадо ва Рафаэл Маркесларнинг имзоси туширилган либослар кимошди савдосида сотилган эди. Бу сафар София барча мексикалик футболчилардан ёрдам сўрамоқда.
“2017 йилда мен Мексикадаги зилзила оқибатида жабрланганларга ёрдам бериш мақсадида Futbol1Sismo0 лойиҳасини амалга оширгандим. Имзолар туширилган либосларни сотиш орқали 200 минг песо олдим ва ушбу пулларни барча нарсаларидан айрилган 5 та оилага давлат фонди орқали йўналтирдим. Туркияда ҳам шу ишни такрорламоқчимиз. Аллақачон “Бешиктош” футболчиларидан бирининг либосини кимошди савдосида сотганман ва жабрланганларга вақтинчалик бошпана берадиган ташкилот билан боғланганман”, — дейди Альварес.
Изоҳ (0)