Bosh prokuraturada Xalqaro-huquqiy boshqarma boshlig‘i R.Giyasov va AQSH Federal tergov byurosi vakillari o‘rtasida uchrashuv bo‘lib o‘tdi. Bu haqda idora matbuot xizmati xabar berdi.
Qayd etilishicha, uchrashuvda tomonlar idoralar o‘rtasidagi aloqalarni mustahkamlashga qaratilgan bir qator yo‘nalishlarni muhokama qilgan, xususan, uyushgan jinoyatchilik, jinoiy ishlar doirasida huquqiy yordam ko‘rsatish, ekstraditsiya va shu kabi sohalarni taʼkidlab o‘tgan.
Shu bilan birga, ikki idora o‘rtasida imzolangan anglashuv memorandumi qoidalarining ijrosini taʼminlash maqsadida tayyorlangan Hamkorlik dasturi loyihasi yuzasidan fikr almashilgan.
Mazkur uchrashuvda R.Giyasov AQSH FTBning vakili E.Jonsning O‘zbekistondagi faoliyati yakunlangani sababli, unga ikki davlat idoralari o‘rtasidagi hamkorlikni rivojlanishiga xizmat qilgan faoliyati uchun minnatdorchilik bildirgan.
Shuningdek, AQSHning Toshkentdagi elchixonasidagi Federal tergov byurosi (FTB) vakili sifatida tayinlangan F.Tensining faoliyatida zafarlab tilanib, Bosh prokuratura va AQSH FTB o‘rtasidagi munosabatlarni yanada mustahkamlanish hamda yangi darajaga chiqishiga ishonch bildirgan.
Eslatib o‘tamiz, 2022-yil iyulda Jonatan Xennik AQSHning O‘zbekistondagi yangi elchisi etib tasdiqlangandi. Sobiq elchi Rozenblyum AQSHning Qozog‘istondagi elchisi etib tayinlangan.
Izoh (0)